Razumnyja akulary Google Glass stanuć dastupnymi ŭ 2015 hodzie
Karparacyja Google spynić vytvorčaść razumnych akularaŭ Google Glass i rearhanizuje biznes, kab vypuścić hadžet na rynak u 2015 hodzie, paviedamlaje telekanał CNBC.
16.01.2015 / 12:31
Suzasnavalnik Google i kiraŭnik łabaratoryi Google X Siarhiej Bryn u akularach Google Glass. Fota: digitaltrends.com
Prajekt Google Glass pakinie łabaratoryju pierśpiektyŭnych prajektaŭ Google X i stanie samastojnym padraździaleńniem. Jaho ŭznačalić dyrektar kuplenaj Google kampanii Nest (što vypuskaje razumnyja ermastaty) Toni Fadeł. Navina nijak nie paŭpłyvała na akcyi «karparacyi dabra», jak niaredka nazyvajuć Google.
Vytvorčaść i prodažy papiaredniaha pratatypu Google Glass buduć spynienyja 20 studzienia. Novaja, užo spažyvieckaja viersija vyjdzie na rynak u 2015 hodzie. Novaja viersija Google Glass atrymaje pracesar ad Intel i bolej mahutnuju batareju.
Prykładna stolki miesca zajmaje ŭ poli zroku vyjava z akularaŭ Google Glass. Fota z prezientacyi Google
Google Glass źjaŭlajecca svajeasablivym dadatkovym ekranam dla smartfona i nosicca na hałavie jak akulary. Praź sistemu linz karcinka pakazvajecca niby na adlehłaści ŭ paŭmietry ad karystalnika i nie zajmaje šmat miesca ŭ poli zroku. Z dapamohaj sensarnaj paneli na dužcy, ruchaŭ hałavoj i hałasavych kamand možna telefanavać, zdymać fota i videa, čytać dy adsyłać poštu i SMS, prahladać internet-staronki i navat hulać u hulni z «dapoŭnienaj rečaisnaściu». Kab źviarnucca da akularaŭ, dastatkova skazać «OK, Glass».
Čytajcie taksama: Google pakazaŭ, što ŭmiejuć jaho «razumnyja akulary»
Testavańnie akularaŭ pačałosia ŭ 2013 hodzie. Pratatyp pad nazvaj Explorer Edition možna było nabyć za 1500 dalaraŭ. Testavańnie vykryła nie stolki techničnyja, kolki jurydyčnyja prablemy: ludziej chvalavała kamiera, na jakuju možna rabić «špijonskija» zdymki i biaśpieka pry vykarystańni na vulicach i za rulom. Taksama ŭ niekatorych ekśpiertaŭ vyklikała pytańni małaja funkcyjanalnaść pratatypu i adsutnaść napraŭdu inavacyjnych scenaroŭ vykarystańnia.
Čakajecca, što spažyvieckaja viersija Google Glass budzie kaštavać značna mieniej za 1500 dalaraŭ.
«Žaleza» akularaŭ kaštuje ŭsiaho 80 dalaraŭ. Ekśpierty nazyvajuć vierahodnaj cenu ŭ 300 dalaraŭ dla spažyvieckaj viersii.
Čytajcie taksama: 10 technałahičnych trendaŭ, jakija zrobiać naša žyćcio lepšym