Amierykanski inviestar kupiŭ 6,6% akcyj EPAM na 195 młn dalaraŭ
JPMorgan Chase dastałosia 6,6% biełaruska-amierykanskich raspracoŭščykaŭ.
05.03.2015 / 23:40
Fota: dev.by
Inviestycyjnaja kampanija JPMorgan Chase skupaje akcyi EPAM, paviedamlaje CNews sa spasyłkaj na Kamisiju pa kaštoŭnych papierach ZŠA. Na dadzieny momant amierykanski inviestar nabyŭ 6,6% akcyj. Taki pakiet kaštuje 195 młn dalaraŭ.
Akramia taho JPMorgan Chase nabyli 4,5% akcyj Luxoft, mižnarodnaj kampanii z rasijskimi karaniami.
Analityki addajuć pieravahu EPAM jak abjektu doŭhaterminovych inviestycyj JPMorgan Chase.
Z 2012 hoda EPAM pryvabiła šerah bujnych inviestaraŭ: Waddell & Reed nabyli 7% akcyj, Fidelity Managment & Research — 12%, Pennant Capital — 5%. Na siońnia doli fondaŭ mieniej: Waddell & Reed maje 4,7% akcyj, Fidelity — 3,5%.
Svaju dolu častkova raspradaje suzasnavalnik i prezident kampanii Arkadź Dobkin.
Paśla pieršasnaha publičnaha raźmiaščeńnia akcyj (IPO) jon vałodaŭ 12,5% akcyj, hod tamu mieŭ 6,7%, siońnia vałodaje 5,5%.
Hod tamu akcyi EPAM pieražyli padzieńnie ŭ canie: z 44$ u lutym da 30$ u mai. Padzieńnie źviazvajuć z padziejami va Ukrainie, dzie znachodzicca častka supracoŭnikaŭ kampanii. U kancy 2014 hoda akcyi znoŭ stali raści. Na siońnia akcyi handlujucca za 62 dalary.
***
EPAM Systems byŭ stvorany ŭ 1993 hodzie ŭ Prynstanie, štat Ńju-Džersi, ZŠA. Suzasnavalnikami vystupili byłyja adnakłaśniki Arkadź Dobkin i Leanid Łoźnier. Asnoŭnyja zaniatki kampanii — raspracoŭka prahramnaha zabieśpiačeńnia, intehracyja praduktaŭ, kansałtynh. Na siaredzinu 2014 hoda kapitalizacyja kampanii skłała 2,14 młrd dalaraŭ. Najbujniejšym pa kolkaści śpiecyjalistaŭ padraździaleńniem EPAM jość centr raspracoŭki ŭ Minsku, ź jakoha pačynałasia historyja pracy kampanii.
JP Morgan — adna z najstarejšych amierykanskich inviestycyjnych kampanij. Zastnavanaja ŭ 1799 hodzie. Na siońnia maje aktyvy na 2,4 trłn dalaraŭ.