Uładzimir Kličko: Pucina treba spynić
17.03.2015 / 18:19
Čempijon śvietu pa boksie siarod prafiesijanałaŭ u ciažkaj vazie Uładzimir Kličko ŭ intervju francuzskaj haziecie L'Equipe abrynuŭsia z krytykaj na rasiejskaha prezidenta Uładzimira Pucina, abvinavaciŭšy jaho ŭ raspalvańni suśvietnaj vajny.
Małodšy brat viadomaha ŭkrainskaha palityka, mera Kijeva Vitala Kličko daŭ intervju papularnaj štodzionnaj spartyŭnaj haziecie napiaredadni boju z amierykancam Brajntam Dženinhsam, u jakim ukrainiec budzie abaraniać svoj čempijonski tytuł. Hety boj projdzie 25 krasavika ŭ Ńju-Jorku.
Adkazvajučy na pytańnie ab tym, što b jon skazaŭ Pucinu, kali b sustreŭsia ź im tvar u tvar, Kličko adkazaŭ: «Što jon ździajśniaje tyja ž pamyłki, jakija rabilisia ŭ minułym».
«Hetaja vajna biessensoŭnaja, my — jak braty, — skazaŭ baksior. — Praz dva hady, piać ci 20 hadoŭ Rasija paprosić prabačeńnia za svaju ahresiju i anieksiju Kryma».
«Paśla taho, što zdaryłasia ŭ Druhoj suśvietnaj vajnie, nielha ihnaravać mižnarodnyja zakony. Toje, što adbyvajecca ciapier, moža spravakavać treciuju suśvietnuju vajnu», — dadaŭ Kličko.
Uładzimir Kličko zaklikaŭ krainy Zachadu zaniać bolš rašučuju pazicyju ŭ adnosinach da Rasii. «Ja dumaju, što jeŭrapiejskaja supolnaść śpić. Pucin robić, što choča», — padkreśliŭ jon.
«U boksie jość paniaccie «napad na napadnika». Jon nie spynicca, kali my nie pakažam jamu, dzie jaho miaža. Inakš jon budzie praciahvać iści napierad», — skazaŭ čempijon śvietu pa boksie.
Kličko paćvierdziŭ, što hatovy sa zbrojaj u rukach abaraniać svaju krainu, kali atrymaje pozvu va ŭkrainskuju armiju.