Pieramovy ab pačatku viaščańnia ŭkrainskaha kanała ŭ Biełarusi praciahvajucca
25.03.2015 / 08:29
Pieramovy ab pačatku viaščańnia ŭkrainskaha kanała ŭ Biełarusi praciahvajucca, paviedamiŭ biełaruski pasoł u Kijevie Valancin Vialička ŭ intervju infarmacyjnamu ahienctvu Ukrainskije novosti (tekst raźmieščany na sajcie źniešniepalityčnaha viedamstva Biełarusi).
«Praca praciahvajecca. Hety prajekt patrabuje ŭzvažanaści. Treba vyrašyć pytańnie ź finansavańniem. U žyćci jość taki tezis: kali ty zrabiŭ štości chutka, ale niajakasna, usie zabuduć, što ty zrabiŭ chutka, ale kali ty zrabiŭ pavoli, adnak jakasna, usie zabuduć, što ty zrabiŭ heta pavoli. Tak, my vielmi chočam realizavać hety prajekt, ale ad žadańnia da realii zaŭsiody jość niejki pramiežak času, jaki patrabuje detalizacyi», — skazaŭ Vialička.
Pra arhanizacyju viaščańnia ŭkrainskaha kanała («Piervyj nacionalnyj») damovilisia ŭ kancy minułaha hoda prezident Ukrainy Piatro Parašenka i jaho biełaruski kaleha Alaksandr Łukašenka.
«My daŭno kazali pra toje, što biełarusy majuć prava viedać roznyja punkty hledžańnia, i było b niakiepska, kali b adzin ź infarmacyjnych kanałaŭ Ukrainy mieŭ mahčymaść tranślavacca na terytoryi Biełarusi», — skazaŭ ukrainski kiraŭnik.
Čakałasia, što kanał pačnie viaščańnie ŭ studzieni.