Biełaruskim vajskoŭcam zabaranili kuryć na chadu i trymać ruki ŭ kišeniach
26.03.2015 / 16:45
U Biełarusi ŭstupiŭ u siłu ŭkaz ad 4 vieraśnia 2014 hoda numar 432, jaki ŭnios źmianieńni ŭ ahulnavoinskija statuty Uzbrojenych Sił, paviedamili ŭ Ministerstvie abarony Biełarusi.
«Pravavy akt byŭ padrychtavany ŭ suviazi ź nieadpaviednaściu asobnych pałažeńniaŭ ahulnavoinskich statutaŭ Uzbrojenych Sił Biełarusi arhanizacyjnaj struktury Uzbrojenych Sił i zakanadaŭčym aktam Respubliki Biełaruś u vajennaj sfiery», - rastłumačyli ŭ abaronnym viedamstvie. Za čas isnavańnia vydadzienych u 2001 hodzie ahulnavoinskich statutaŭ źmianieńni i dapaŭnieńni ŭ ich unosilisia vosiem razoŭ. «U rešcie rešt naśpieła nieabchodnaść u ich novaj redakcyi», — kanstatavali ŭ Minabarony.
U novaj redakcyi statuta ŭnutranaj słužby ŭviedziena norma, jakaja zabaraniaje vajskoŭcam pry našeńni vajennaj formy adzieńnia trymać ruki ŭ kišeniach, a taksama kuryć na chadu i ŭ miescach, nie adviedzienych dla hetaha. «U papiaredniaj redakcyi ahulnavoinskich statutaŭ hetyja normy mieli bolš łajalny charaktar, heta značyć vajskoŭcam nie rekamiendavałasia pieraličanaje», — raskazali ŭ Minabarony.
Taksama sa statutaŭ vyklučany pałažeńni, jakija datyčacca dyscyplinarnaj voinskaj častki, pakolki raniej jana była likvidavana i ŭ zakanadaŭstva ŭnosilisia adpaviednyja źmianieńni. Pryviedzieny ŭ adpaviednaść nazvy niekatorych voinskich pasad, vyklučany šerah terminaŭ, jakija nie adpaviadajuć isnujučaj struktury Uzbrojenych Sił (korpus, dyvizija i inšyja).
Akramia taho, sa statuta ŭnutranaj słužby vyklučany abmiežavańni ŭ adnosinach da vajskoŭcaŭ, jakija nie prynieśli prysiahu.
«Tym samym vyklučana dvajakaje tłumačeńnie normy: u zakonie «Ab voinskim abaviazku i voinskaj słužbie» isnuje tolki adno abmiežavańnie — vajskoŭcy, jakija nie prynieśli vajennuju prysiahu, nie mohuć pryciahvacca dla vykanańnia bajavych zadač. U ahulnavoinskich statutach, jakija byli vydadzieny raniej, čym apošniaja redakcyja zakona, isnavali dadatkovyja abmiežavańni: takich vajskoŭcaŭ nie mahli naznačać na voinskija pasady, nakładać na ich dyscyplinarny aryšt, pradastaŭlać zvalnieńnie z raźmiaščeńnia voinskaj čaści. U suviazi z pryzyvam asob, jakija pa relihijnych pierakanańniach admaŭlalisia prymać vajennuju prysiahu, uźnikała šmat pytańniaŭ u chodzie prachodžańnia imi vajennaj słužby», — rastłumačyli ŭ ministerstvie.