Top-100 samych upłyvovych biełarusaŭ. 6. Uładzimir Makiej

05.04.2015 / 18:29

6 (6). Uładzimir Makiej

Ministr zamiežnych spravaŭ.

Zdajecca, «panižeńnie» da ministra zamiežnych spravaŭ mała jak adbiłasia na Uładzimiru Makieju. Naadvarot, hety čynoŭnik, jaki dobra vałodaje niamieckaj i anhlijskaj movami, adčuvaje siabie bolš upeŭniena ŭ kalidorach Brusela i Strasburha, čym naviedvajučy zavod u Klimavičach ci siedziačy na naradach ab palaŭnictvie i rybałoŭstvie.

Makiej enierhičny i cikaŭny. Jon umieje pažartavać i paśmiajacca. Heta vysoka cenicca jak zamiežnymi haściami, hetak i kiraŭnikom krainy. Makiej zdolny začaravać mnohich.

Čynoŭnik užo byŭ kanstruktaram adnoj z «adlih» aficyjnaha Minska i Jeŭropy. Siońnia naśpiavaje nastupnaja. I ŭ hałoŭnych rolach znoŭ hety samy raźviedčyk rodam z Karelickaha rajona.

Cytata

«My chočam być roŭna nabližanymi i da Uschodu, i da Zachadu, i da Poŭdnia, i da Poŭnačy, i da kosmasu, i, moža być, da hłybiń Ziamli».

Luty 2015.

Abjektyŭka

Nar. u 1958 u vioscy Niekraševičy Karelickaha rajona. Skončyŭ Minski dziaržaŭny instytut zamiežnych movaŭ (1980), słužyŭ u savieckaj raźviedcy (1980—1992), pałkoŭnik zapasu. Pieravučvaŭsia ŭ Dypłamatyčnaj akademii MZS Aŭstryi (1992—1993). Znachodziŭsia na dypłamatyčnaj słužbie (1993—2000), pracavaŭ pamočnikam prezidenta (2000—2008), kiraŭnikom Administracyi prezidenta (2008–2012). Ad žniŭnia 2012 — ministr zamiežnych spravaŭ. Maje synoŭ ad abodvuch šlubaŭ. Druhaja žonka — aktrysa i televiadučaja.

* * *