Velcom: 360 miljonaŭ na viecier
Dola dziaržavy (nia ŭradu!) ŭ MŁS była pradadzienaja nie za 290 i nie 344 młn. dalaraŭ, a za 412 młn. Ahulnaja suma damovy pa pieraprodažy Velcom afšornaj kiprskaj kampanijaj aŭstryjcam skłała kala 1,5 młrd dalaraŭ. Takim čynam, biełaruskija ŭłady niedaacanili dziaržaŭnuju dolu prykładna na 360 młn. dalaraŭ.
31.01.2008 / 20:47
Nahadajem, što ŭ žniŭni 2007 h. biełaruskaja dziaržava biez praviadzieńnia tenderu pradała svaju dolu (51 %) ŭ pradpryjemstvie «Mabilnaja ličbavaja suviaź» inšamu jaje zasnavalniku, kampanii SB‑Telecom. Suma damovy nie nazyvałasia.
Hałoŭnaja intryha źjaviłasia ŭ kastryčniku, kali kiprski SB‑Telecom całkam pierajšoŭ va ŭłasnaść Telekom Austria Group za sumu 1,05 młrd eŭra. Uźnikła padazreńnie, što na aperacyi Biełaruś zhubiła ad 200 da 400 młn dalaraŭ ZŠA, jak pra heta zaznačyŭ A. Milinkievič u admysłovaj zajavie.
Na minułam tydni Nacbank daŭ mahčymaść usim cikaŭnym upeŭnicca ŭ słušnaści takoj acenki, nadrukavaŭšy płaciožny bałans Biełarusi za III kvartał 2007 h. Adnak, adrazu ž źjavilisia roznyja versii nakont vieličyni sumy, atrymanaj ad prodažy akcyj. Tak, AFN paviedamiła, što dziaržaŭnaja dola MŁS była pradadzienaja za 344 młn. dał, a "Biełaruskija naviny" dali inšuju ličbu — $290 młn. Błytanina ŭźnikła taksama i z tym, što žurnalisty pabłytali subjektaŭ znosin — Biełaruś i ŭrad Biełarusi.
Źviarnuŭšysia da płaciožnaha balansu, my ŭbačym, što za pieršyja try kvartały 2007 h. u Biełaruś pastupiła 1058,7 młn dalaraŭ naŭprostavych zamiežnych investycyj u formie akcyjaniernaha kapitału. Suma, atrymanaja ad prodažu akcyj Velcom u dakumencie nie paznačana. Adnak viedajučy sumu damovy pa prodažy 12,5 % akcyj «Biełtranshazu» (625 młn. dalaraŭ), a taksama pamier inšych pastupleńniaŭ (183,7 młn dalaraŭ), lohka znajści roźnicu, jakaja składaje roŭna 250 młn dalaraŭ. Mienavita stolki było atrymana za akcyi mabilnaha aperatara. I tut bolšaść žurnalistaŭ dapuściła pamyłku, paličyŭšy, što hetyja srodki pastupili za ŭvieś dziaržaŭny pakiet akcyj. Nasamreč, u tekście vyšej zhadanaha dakumentu jasna paznačana, što srodki pastupili ad prodažy «doli ŭradu Respubliki Biełaruś». Hetaja dola składała ŭ statutnym fondzie MŁS tolki 30,9 %, u toj čas jak 20 % naležali ZAT «Biełtechekspart», a 0,1 % — RUP «Biełtelekam». Takim čynam, u płaciožnym balansie adlustravana tolki toje, što ŭ biudžet pastupili 250 młn dalaraŭ mienavita za tyja 30,9 %. Dzie hrošy ad prodažu astatnich 20,1 % — skazać ciažka. Mahčyma, jany pastupili ŭ biudžet u IV kvartale albo pastupiać sioleta.
Prostaja aryfmietyka pakazvaje, što dola dziaržavy (nia ŭradu!) u MŁS była pradadzienaja nie za 290 i nie 344 młn dalaraŭ, a za 412,6 młn. Ahulnaja suma damovy pa pieraprodažy Velcom afšornaj kiprskaj kampanijaj aŭstryjcam skłała kala adnaho z pałovaj miljarda dalaraŭ. Takim čynam, biełaruskija ŭłady niedaacanili dziaržaŭnuju dolu prykładna na 360 młn. dalaraŭ. Akurat takuju ličbu, darečy, daje analityčnaja słužba Ruchu za Svabodu, kamentujučy źjaŭleńnie novych statystyčnych źviestak.