Prajekt «Rasii Siehodnia» zahavaryŭ pa-biełarusku
Pra «ŭ radyjeaktyŭny popieł» pakul nie pišuć.
16.04.2015 / 11:03
Prajekt MIA «Rasija Siehodnia» Sputnik.by zapuściŭ biełaruskamoŭnuju viersiju sajta.
«Viersija na nacyjanalnaj movie sputnik.by budzie dapaŭniać ruskamoŭnuju viersiju, jakaja dastupna karystalnikam sa śniežnia 2014 hoda. U chutkim časie nacyjanalnuju viersiju sajta płanujecca dapoŭnić radyjoviersijaj», — piša biełaruskaja redakcyja ŭ svaim błohu na Facebook.
MIA «Rasija Siehodnia» i asabista jaje dyrektara, televiadoŭcu Dźmitryja Kisialova niekatoryja nazyvajuć «ruparam Kramla». Vykazvańni Kisialova i pazicyja jaho infarmahienctva (antyapazicyjnyja, antyamierykanskija, hamafobskija vykazvańni) niaredka krytykujucca za miažoj.
Biełaruski «Sputnik» pakul nie zajmajecca ahitacyjaj, naviny majuć pieravažna niejtralny ton. U navinach na sajcie možna znajści spasyłki jak na dziaržaŭnuju, tak i niezaležnuju presu. Naviny pa-biełarusku vychodziać paźniej za anałahičnyja pa-rusku.
Naviny pišucca aficyjnym pravapisam, pieravažna biez pamyłak. Praŭda, adna navina raspaviadaje pra «Druhuju Ajčynnuju Vajnu» (peŭna, majučy na ŭvazie Druhuju Suśvietnuju).
Pa słovach Kisialova, prajekt Sputnik, što budzie pracavać na troch dziasiatkach moŭ u roznych krainach śvietu, raźličany na aŭdytoryju, jakaja «stamiłasia ad naviaźlivaj prapahandy adnapalarnaha śvietu i maje patrebu ŭ alternatyŭnym punkcie hledžańnia».
Čytajcie taksama: Prezident Sierbii pavinšavaŭ Sputnik z zapuskam sajta na sierbskaj movie