Lotčyki F-35 atrymajuć «vočy ad Boha» za $400 tys. kožnaje
16.04.2015 / 11:51
Źniščalnik piataha pakaleńnia F-35 Lightning II, vyprabavańni jakoha ŭ amierykanskaj vajennaj avijacyi padychodziać da kanca, sam pa sabie źjaŭlajecca najbolš składanym uzoram bajavoj techniki ŭ historyi. Jaho časta nazyvajuć latučym kampjutaram, pišuć amierykanskija ŚMI.
Lotčyk F-35 u šlemie
Adnak klučavoj častkaj hetaj mašyny možna nazvać šlem lotčyka, jaki faktyčna abjadnoŭvaje čałavieka i mašynu ŭ adzinuju sistemu. Kaniešnie, jon zrobleny dla taho, kab abaraniać hałavu lotčyka, adnak hałoŭnaja funkcyja, jakaja zrabiła jaho samaj darahoj adzinkaj lotnaha ryštunku ŭsich časoŭ — infarmacyjnaja.
Lotčyk F-35 zdolny bačyć usio, što adbyvajecca vakoł samalota — hetak, kali jon hladzić uniz, ekran šlema nie pakazvaje jamu padłohu kabiny, lotčyk bačyć abłoki i ŭsio toje, nad čym jon lacić. Jamu dapamahajuć u hetym kamiery ŭ abšyŭcy mašyny, jakija vyvodziać na ekran šlema infarmacyju ŭ zaležnaści ad vuhłu nachiłu ci pavarota hałavy piłota.
U.S. Air Force F-35A Lightning II. Fota U.S. Air Force
«Vy možacie zazirnuć u śviet praz vočy samaho źniščalnika», — kaža piłot Eł Norman, jaki vypraboŭvaje mašynu.
Na ekran taksama moža pastupać usia infarmacyja adnosna stanu samalota — kolkaść paliva, chutkaść, vyšynia, mahčymyja paškodžańni i h.d.
Taksama na ekran možna vyvieści taktyčnuju kartu, jakaja pakazvaje raźmiaščeńnie svajoj i varožaj techniki ŭ pavietry i na ziamli.
«Kampjutar apracoŭvaje ŭsiu infarmacyju z sensaraŭ i vyvodzić na ekran hatovuju infarmacyju. Piłot bačyć padziei, jakija razhortvajucca vakoł jaho, padobna Bohu — jon ź vialikaj stupieńniu vierahodnaści viedaje, dzie praciŭnik, što jon robić, što robiać siabry», — zaznačyŭ hienierał avijacyi ZŠA Hiłmery Majkł Chostejdž.
Videa The Washington Post, jakoje demanstruje mahčymaści šlema lotčyka F-35
Pakul što u śviecie isnuje adziny źniščalnik piataha pakaleńnia, jaki staić na ŭzbrajeńni i ŭžo ŭdzielničaŭ u bajavych dziejańniach, — amierykanski F-22 Raptor. Sieryjnaja vytvorčaść mašyny ciahnułasia z 2001 pa 2011 hod i była spynienaja, kab skancentravać vydatki na raspracoŭku i vytvorčaść źniščalnika-bambavika F-35 Lightning II.
Ciapier amierykanskaja avijacyja maje 187 źniščalnikaŭ F-22, jašče bolš za sotniu F-35 prachodziać maštabnyja vyprabavańni ŭ vojsku i vykarystoŭvajucca dla padrychtoŭki piłotaŭ i naziemnaha piersanału.