Махляры ў Беларусі гандлявалі «намібійскімі» алмазамі з выездам у Афрыку
16.04.2015 / 12:17
У Следчым камітэце Беларусі расследуецца крымінальная справа ў дачыненні да арганізаванай групы, якая выкрадала ў даверлівых людзей буйныя сумы грошай пад маркай удзелу ў здзелках па куплі алмазаў з Намібіі.
51-гадовы жыхар Гродзенскай вобласці не толькі стварыў устойлівую злачынную групу, у кожнага ўдзельніка якой была свая пэўная роля, але і распрацаваў хітры план падману і крадзяжу грошай.
Для патэнцыяльных пакупнікоў ствараўся вобраз людзей, здольных аказаць дапамогу ў набыцці намібійскіх алмазаў. Зламыснікі распаўсюджвалі падманныя звесткі аб працы ў мінулым у консульстве Беларусі ў Намібіі і наяўнасці сувязяў з асобамі, якія займаюцца здабычай і продажам аламазаў у гэтай афрыканскай дзяржаве.
Для тых, хто сумняваўся ў праўдзівасці інфармацыі і не спяшаўся аддаваць усю суму грошай на куплю алмазаў, махляры арганізоўвалі паездкі ў афрыканскую краіну, дзе дэманстравалі набытыя нібыта за перададзеныя ім сродкі «алмазы».
Затым, каб адвесці ад сябе падазрэнні і стварыць бачнасць выканання са свайго боку ўсіх дагаворных абавязацельстваў у поўным аб'ёме, зламыснікі абвінавачвалі пацярпелых у парушэнні тых ці іншых дамоўленасцяў, дасягнутых паміж бакамі.
Па такой схеме група дзейнічала з 2011 года па 2014-ы.
Зараз па крымінальнай справ затрыманыя арганізатар і двое яго саўдзельнікаў. Ім выстаўленыя абвінавачванні на падставе ч. 4 арт. 209 КК (махлярства, учыненае ў асабліва буйным памеры). Усе трое ўзятыя пад варту.
Прычынай для распачынання крымінальнай справы сталі матэрыялы праверкі галоўнага ўпраўлення па барацьбе з арганізаванай злачыннасцю і карупцыяй МУС.
Следства просіць усіх, хто валодае інфармацыяй аб супрацьпраўнай дзейнасці абвінавачваных, паведаміць пра гэта.