Polik: Deficyt biudžetu EHU 1 młn jeŭra, płanujecca pryciahvać studentaŭ ź inšych rehijonaŭ
16.04.2015 / 16:09
Siońnia ŭ EHU adbyłasia pieršaja pres-kanfierencyja novaha rektara EHU Hery Devida Polika. Razam z Polikam u kanfierencyi prymaŭ udzieł były rektar EHU i ciapierašni prezident univiersiteta Anatol Michajłaŭ.
Videazapis pres-kanfierencyi.
Mnoha pytańniaŭ datyčyłasia samoj pracedury vybara rektara. Mnohija studenty EHU, vykładčyki i pradstaŭniki hramadskaj supolnaści Biełarusi byli aburanyja nieprazrystaściu pracesa vybaraŭ rektara i samoj kandydaturaj Polika.
Anatol Michajłaŭ adznačyŭ, što hetyja pytańni pachodziać ź niedaśviedčanaści ab pracesie vybaraŭ. Michajłaŭ zaŭvažyŭ, što ŭsia pracedura vybaraŭ adpaviadaje mižnarodnym standartam i znachodzicca ŭ adkrytym dostupie dla ŭsich. «Usie patrabavańni da rektara prapisanyja biez uliku nacyjanalnaści, koleru skury, połu», — skazaŭ Michajłaŭ.
Akramia hetaha, Michajłaŭ paprasiŭ nie sumniavacca ŭ prafiesijanaliźmie kamisii pa adbory rektara, bo padstaŭ dla sumnievaŭ niama. Što tyčycca nacyjanalnaści rektara, Michajłaŭ adznačyŭ, što ZŠA — adzin ź lidaraŭ u halinie vyšejšaj adukacyi, i admaŭlać dośvied hetaj krainy dziŭna, bo admaŭleńnie zamiežnaha dośviedu Biełaruśsiu ciaham doŭhaha času užo pryniesła jaskravyja rezultaty.
«Dziŭnymi» nazvaŭ Michajłaŭ i zakliki pravieści pieravybary rektara. «Praviły hulni nie mianiajucca padčas hulni. I tyja, chto ŭdzielničaŭ u vybarach, pryniali ich takimi, jakimi jany byli», — skazaŭ Michajłaŭ.
Siabra Kiraŭničaj rady EHU Den Devidsan paprasiŭ nahadać, što adpaviedna Statutu EHU, rektar hetaj navučalnaj ustanovy nie vybirajecca, a pryznačajecca.
Što tyčycca ekanamičnaj situacyi ŭ EHU, Polik paćvierdziŭ isnavańnie vialikaha biudžetnaha deficitu.
«Na dadzieny momant deficyt biudžetu ŭniviersiteta składaje 1 miljon jeŭra. Hety deficyt uźnik jašče da majho pryznačeńnia na pasadu prarektara. Bolš za toje, vyrašeńnie finansavych prablem i stała pryčynaj zaprasić mianie kansultantam u EHU», — raskazaŭ Polik.
Pryčynaj Polik nazvaŭ «balučy» pierajezd EHU ź Minska ŭ Vilniu. «Kali było pryniata rašeńnie pracavać adpaviedna pracoŭnamu zakanadaŭstvu Litvy, adrazu ŭźnik taki deficyt. Adnak Kiraŭničaja rada i trastavy fond pahadzilisia na takija ŭmovy, bo nieabchodna pavažać zakony krainy, jakaja dała prytułak EHU», — paviedamiŭ jon.
Polik patłumačyŭ, što, kab vyrašyć finansavyja pytańni, užo ŭletku ŭniviersitet pačnie praces stratehičnaha płanavańnia:
«Raniej padavałasia, što srodkaŭ chopić na try hady isnavańnia ŭniviersiteta. Adnak vyjaviłasia, što heta nie resursy trastavaha fondu zamarožanyja. Zamarožany i 2-miljonny tranš ad sieviernaha savietu. Umovaj razmarozki hetych srodkaŭ źjaŭlajecca zbałansavany biudžet. Pravieści aptymizacyju vydatkaŭ raniej było niemahčyma praz ahresiŭnyja vykliki, pošuk rektara. Ale ciapier my płanujem zrabić heta da kanca 2015 — pačatku 2016 hoda».
Polik adznačyŭ, što budzie praviedzienaja acenka efiektyŭnaści navučalnych prahram. Stratehičnaje płaniravańnie vyjavić tyja śfiery, jakija patrebnyja ŭniviersitetu i jakija nie apraŭdvajuć siabie. U suviazi z hetym mohuć źniknuć niejkija ź isnujučych i źjavicca novyja navučalnyja prahramy.
Zakranuŭ Polik i mahčymaje pavyšeńnie płaty na navučańnie, jakoje chvaluje studentaŭ. Jon padkreśliŭ, što ŭ niaprostaj dla ŭniviersiteta situacyi buduć šukacca rašeńni, jakija dazvolać studentam być zdolnymi apłočvać navučańnie, a ŭniviersitetu — vyžyvać.
«Kali siarod našych studentaŭ jość tyja, chto moža płacić bolš, jany pavinny płacić bolš. I naadvarot», — adznačyŭ Polik.
«Pavyšeńnie koštu navučańnia ciahnie za saboju peŭnyja ciažkaści dla studentaŭ. Z adnaho boku, univiersitet zaŭsiody musić pavyšać jakaść adukacyi. Z druhoha boku, univiersitet musić akazvać padtrymku tym, kamu jana patrebnaja», — skazaŭ Polik. Adnym z mahčymych sposabaŭ pryciahnieńnia srodkaŭ Polik nazvaŭ pryciahnieńnie studentaŭ z «inšych rehijonaŭ».
Datyčna aryjentavanaści EHU na Biełaruś, Anatol Michajłaŭ zapeŭniŭ, što EHU — navučalnaja ŭstanova, stvoranaja ŭ Biełarusi i dla Biełarusi, jakaja dahetul pracuje na karyść Biełarusi, i «sumniavacca ŭ hetym dziŭna».
Adnak Michajłaŭ nie bačyć vyklučnaj roli biełaruskaj movy ŭ pracesie navučańnia ŭ EHU:
«EHU musić być adkryty ŭsim movam. Akcent u naźvie ŭniviersiteta mienavita na tym, što jon jeŭrapiejski, heta sproba naviarstać prabieły ŭ humanitarnych viedach, što zhublenyja za hody panavańnia dziaržaŭnaj ideałohii. Heta tyja viedy, jakija isnujuć na anhlijskaj, niamieckaj, francuzskaj movie. I zamianiać aryhinały pierakładami, jakija sastupajuć im pa jakaści, nielha.
Ja maru, kab EHU byŭ padobny da Univiersiteta Luksiemburha, dzie navučańnie viadziecca adrazu na anhlijskaj, niamieckaj, francuzskaj».