Pucin paabiacaŭ stvaryć rasijskuju kaśmičnuju stancyju da 2023 hoda
Stancyja maje «ahromnistaje narodna-haspadarčaje i ŭsialakaje inšaje śpiecyjalnaje značeńnie».
16.04.2015 / 16:53
Arbitalny kompleks «Mir», zatopleny ŭ 2001 hodzie. Fota: «Raskosmas»
Padčas pramoj linii Uładzimir Pucin paviedamiŭ ab płanach pa stvareńni rasijskaj arbitalnaj stancyi da 2023 hoda.
«MKS aktyŭna vykarystoŭvajecca dla navuki, narodnaj haspadarki, ale ź jaje bačna tolki 5% terytoryi Rasii, a z nacyjanalnaj stancyi my majem pabačyć usiu terytoryju našaj ahromnistaj krainy»,
— miarkuje kiraŭnik Rasii.
Raniej paviedamlałasia ab padrychtoŭcy prapanovy Rasii da Indyi i Kitaja pa stvareńni supolnaj kaśmičnaj stancyi.
Ab ułasnaj kaśmičnaj stancyi Rasija pačała kazać u kancy 2014 hoda. Rasijskija ŭłady nie chočuć praciahvać ekspłuatacyju MKS dalej za 2024 hod.
Ad ułasnaj kaśmičnaj stancyi «Mir» Rasija admoviłasia ŭ 2001 hodzie — siarod inšych pryčyn byŭ vysoki košt, 200 młn dalaraŭ na hod. Zaraz na MKS Rasija maje prava na pałovu ekipažu, ale tracić na prajekt u šeść razoŭ mieniej za ZŠA.
Paralelna z Rasijaj płany pa budaŭnictvie ŭłasnaj arbitalnaj stancyi maje Kitaj. Zaviaršyć jaje razhortvańnie płanujecca da 2022 hoda.
Čytajcie taksama: Rasija znoŭ źbirajecca na Miesiac