Мінадукацыі: Кветкам і бутэрбродам на выпускных экзаменах не месца
16.04.2015 / 17:49
Практыку арганізацыі выпускных экзаменаў у школе, калі бацькі рыхтуюць кветкі для экзаменатараў, накрываюць сталы (цукеркі, бутэрброды, ваду) трэба выкараняць.
Пра гэта паведаміла начальнік упраўлення агульнай сярэдняй адукацыі Міністэрства адукацыі Святлана Уклейка ў час анлайн-канферэнцыі «Уступная кампанія-2015» на сайце БелТА.
«Гэта якраз той выпадак, калі традыцыя не зразумела адкуль узнікла і як стваралася. Гэтага ў прынцыпе нельга рабіць. І не трэба хадзіць за досведам у іншыя краіны. У нас у рэспубліцы ўжо даволі шмат устаноў, якія ў сябе гэту сітуацыю прынцыпова агаворваюць», — сказала Святлана Уклейка.
Яна таксама дадала, што прыём экзаменаў для настаўніка — гэта работа, якая прапісана службовымі абавязкамі, правіламі ўнутранага працоўнага распарадку. «Усё адбываецца ў рамках рабочага часу», — падкрэсліла начальнік упраўлення.
Святлана Уклейка таксама адзначыла, што ў міністэрства, на жаль, паступаюць такія звароты. Хоць трэба аддаць належнае: за апошні час іх становіцца менш.