Łukašenka daručyŭ «vykinuć» inviestaraŭ budaŭnictva damoŭ nasuprać «Minsk-Areny»
Alaksandr Łukašenka zaniepakojeny nievykanańniem daručeńniaŭ pa raźvićci Minska. Pra heta jon zajaviŭ siońnia na naradzie.
28.04.2015 / 13:05
BiełTA
«Daručeńniaŭ było vielmi šmat, ja ŭžo vykazvaŭ svaju zaniepakojenaść, što pakul nie baču ich vykanańnia, što, viadoma, nieprymalna, — skazaŭ kiraŭnik dziaržavy. — Tym bolš jany ž nie kaśmičnyja».
Na dumku kiraŭnika dziaržavy, u mera Minska kałasalnyja mahčymaści, jakija dazvalajuć apieratyŭna vykanać daručeńni kiraŭnika dziaržavy.
«U Minsku pracy šmat. Mer Minska — heta ciažkaja praca, uvieś čas na vačach. Minsk pavinien dynamična raźvivacca. Ja nie mahu dapuścić, kab byŭ niejki zastoj. Tamu i maje adpaviednyja patrabavańni», — adznačyŭ Alaksandr Łukašenka.
Łukašenka zapatrabavaŭ paviedamić ab kadravych pytańniach. «Ja taksama turbujusia za toje, kab ciapierašni staršynia harvykankama nie loh na pasadu, — skazaŭ kiraŭnik dziaržavy.
— Ludziej razhaniać nie treba, usiakija momanty byvajuć u žyćci, ale kali čałaviek praz 3 miesiacy, paŭhoda na pasadzie nie spraŭlajecca z abaviazkami, tady treba takich rabotnikaŭ mianiać, nie adkładajučy ŭ doŭhuju skryniu. Sprava ciarpieć nie pavinna».
Alaksandr Łukašenka pacikaviŭsia raźvićciom pramysłovaści Minska, pakolki ad jaje šmat u čym zaležyć raźvićcio pramysłovaści ŭ krainie, realizacyjaj inviestycyjnych prajektaŭ.
«Jość pytańni pa šerahu abjektaŭ, jakija našy tak zvanyja hora-inviestary nie pabudavali, uzialisia i nie zrabili.
Dapuścim, nasuprać «Minsk-Areny» ŭ Lebiadzinym. Ja daručyŭ Minskamu harvykankamu vykinuć hetych inviestaraŭ z krainy i dabudavać hetyja damy i pradać», — skazaŭ kiraŭnik dziaržavy.
Na jaho dumku, hrošy, atrymanyja ad prodažu, možna nakiravać na budaŭnictva nievialikaha funkcyjanalnaha centra mastackaj himnastyki.
Akramia taho, Alaksandr Łukašenka zakranuŭ pytańni dobraŭparadkavańnia horada da Dnia Pieramohi, padkreśliŭšy, što ŭ terminovym režymie Minsk nieabchodna pryvieści ŭ naležny paradak.