Makiej sustreŭsia z pasłom Ježalem, jakoha Kijeŭ źbirajecca adklikać ź Biełarusi

28.04.2015 / 13:49

mfa.gov.by

28 krasavika adbyłasia sustreča ministra zamiežnych spraŭ Respubliki Biełaruś Uładzimira Makieja z pasłom Ukrainy ŭ Biełarusi Michaiłam Ježalem, paviedamlaje pres-słužba MZS.

Baki abmierkavali raźvićcio ŭnutranaj situacyi va Ukrainie i ŭ zonie kanfliktu na ŭschodzie krainy, uzajemadziejańnie dźviuch krain u ramkach mižnarodnych arhanizacyj, a taksama paradak dnia biełaruska-ŭkrainskich adnosin. Adbyŭsia abmien dumkami pra pierśpiektyvy naroščvańnia handlova-ekanamičnaha supracoŭnictva, padkreślena ŭzajemnaja zacikaŭlenaść u dalejšym raźvićci ŭzajemnaha handlu i kaapieracyjnych suviaziaŭ, pavieličeńni dvuchbakovaha tavaraabarotu.

***

Nahadajem, što 25 krasavika prezident Piatro Parašenka zajaviŭ, što pasoł Ježal budzie adklikany ź Biełarusi.

«Mnoju pryniata rašeńnie ab jaho adklikanni», — skazaŭ jon, padkreśliŭšy, što Minsk ciapier hraje vielmi vialikuju rolu ŭ realizacyi zamiežnaj abaronnaj palityki i palitycy biaśpieki: «Ja pavinien uličvać hetuju rolu, kab zabiaśpiečyć pastajannuju prysutnaść Ukrainy ŭ Minsku».

Michaił Ježal byŭ pryznačany pasłom Ukrainy ŭ Biełarusi ŭ krasaviku 2013 h. Viktaram Janukovičam.

Zhodna z zakonam ab ačyščeńni ŭłady, pryniatym Viarchoŭnaj Radaj, pad lustracyju traplaje i Ježal, jaki z 2010 pa 2012 hod byŭ ministram abarony Ukrainy, a z 2008 pa 2010 hh. — hałoŭnym inśpiektaram Hałoŭnaj inśpiekcyi Minabarony.

Hienprakuratura Ukrainy pradjaviła abvinavačvańnie ŭ naniasieńni dziaržavie škody na sumu bolš za 42 młn hryŭniaŭ (bolš za $5 młn na momant mierkavanaha złačynstva). Abvinavačvańni tyčacca pieryjadu pracy Ježala na pasadzie ministra abarony ŭ ramkach kryminalnaj vytvorčaści pa faktach padryvu abaranazdolnaści armii.