Sud nad palitviaźniem Statkievičam pieranieśli na 4 maja
28.04.2015 / 14:01
Sud u kałonii nad palitviaźniem, byłym kandydatam u prezidenty Mikołam Statkievičam projdzie 4 maja.
Ab tym, što Mikałaja Statkieviča čakaje čarhovy sud stała viadoma 13 krasavika. Pa słovach žonki palitviaźnia Maryny Adamovič, u kałonii patłumačyli heta nibyta šmatlikimi parušeńniami režymu. U pačatku krasavika na Statkieviča skłali 8 aktaŭ ab parušeńni režymu ciaham adnaho tydnia. Palitviazień byŭ pazbaŭleny karotkaterminovaha spatkańnia, jakoje płanavałasia ŭ hetym miesiacy i praduktovaj pieradačy, pravioŭ try dni ŭ štrafnym izalatary.
A siońnia stała viadoma, što sudździa ŭžo naviedaŭ kałoniju.
«Ź pieršaha dnia, jak stała viadoma pra sud, Mikoła adrazu napisaŭ zajavu na advakata. A siońnia advakat mnie raptam telefanuje, što sudździa ŭžo ŭ kałonii, — kamientuje situacyju Maryna Adamovič. — A sam advakat pra heta nie viedaŭ. Tamu napisali patrabavańnie ab pieranosie suda. Jaho zadavolili i pieranieśli na 4 maja. Što tam zdaryłasia, ci jany chacieli pravieści toj sud cichieńka, kab nichto nie viedaŭ, ci heta prosta zvyjaajnaje hałavaciapstva, ja pakul i sama nie viedaju. Uvohule, źviestak pakul nie šmat».
***
Nahadajem, što Mikoła Statkievič — adziny kandydat u prezidenty Biełarusi na vybarach 2010 hoda, jaki znachodzicca ŭ źniavoleńni. U mai 2011-ha jon byŭ prysudžany da šaści hadoŭ pazbaŭleńnia voli pavodle abvinavačvańnia ŭ arhanizacyi masavych biesparadkaŭ u dzień prezidenckich vybaraŭ. Mižnarodnyja pravaabarončyja arhanizacyi pryznali Statkieviča palityčnym viaźniem. Pieršapačatkova asudžany palityk adbyvaŭ pakarańnie ŭ škłoŭskaj kałonii №17, adnak u studzieni 2012-ha jamu zrabili bolš žorstkija varunki i pieraviali ŭ mahiloŭskuju turmu №4 na try hady. Pa zakančeńni hetaha terminu 12 studzienia hetaha hoda Statkievič viarnuŭsia ŭ škłoŭskuju kałoniju. Ciapier palityku pahražaje novy turemny termin.