Łatvija pieradała krainam — udzielnicam Uschodniaha partniorstva zaprašeńni na Ryžski samit
28.04.2015 / 20:46
Dziaržaŭny sakratar Ministerstva zamiežnych spraŭ Łatvii Andrej Piłdehovič 28 krasavika ŭ Ryzie pieradaŭ kiraŭnikam dypłamatyčnych misij Azierbajdžana, Armienii, Biełarusi, Hruzii, Małdovy i Ukrainy aficyjnyja zaprašeńni na samit Uschodniaha partniorstva. Pra heta paviedamili BiełaPAN u MZS Łatvii.
Samit UP adbudziecca ŭ Ryzie 21—22 maja. Aficyjnyja zaprašeńni krainam — udzielnicam UP padpisali staršynia Jeŭrapiejskaha parłamienta Donald Tusk, staršynia Jeŭrapiejskaj kamisii Žan Kłod Junkier i premjer-ministr Łatvii Łajmdota Straujuma.
Uručajučy aficyjnyja zaprašeńni, Piłdehovič padkreśliŭ, što Ryžski samit daść mahčymaść acanić dasiahnuty prahres z času papiaredniaha samita Uschodniaha partniorstva, jaki prajšoŭ u Vilniusie vosieńniu 2013 hoda. Aprača taho, u Ryzie budzie abmiarkoŭvacca raźvićcio palityki UP i supracoŭnictva pamiž JES i dziaržavami-partniorami UP u miežach dvuchbakovaha i šmatbakovaha ŭzajemadziejańnia.
Padčas sustrečy Piłdehovič i pasły krain Uschodniaha partniorstva abmianialisia dumkami ab padrychtoŭcy da Ryžskaha samita. Jak zaznačyli ŭ MZS Łatvii, pasły vysoka acanili zroblenaje pa padrychtoŭcy da samita UP.
Realizacyja inicyjatyvy JES «Uschodniaje partniorstva» pačałasia ŭ mai 2009 hoda. Adna z asnoŭnych metaŭ UP — sadziejničać stvareńniu palityčnaj asacyjacyi i ekanamičnaj intehracyi JES z uschodnimi susiedziami. U prahramu Uschodniaha partniorstva ŭvachodziać Armienija, Azierbajdžan, Biełaruś, Hruzija, Małdova i Ukraina. U prahramy UP jość dva kirunki: dvuchbakovaje (uklučaje ŭ siabie dvuchbakovaje supracoŭnictva JES i dziaržaŭ-partnioraŭ) i šmatbakovaje (daje ahulnuju płatformu dla supracoŭnictva krain JES i Uschodniaha partniorstva ŭ šerahu abłaściej).
Pieršy samit UP adbyŭsia ŭ 2009 hodzie ŭ Prazie (Čechija), druhi — u 2011 hodzie ŭ Varšavie (Polšča), treci — u 2013 hodzie ŭ Vilni (Litva).