Jehipiet nanoŭ zbuduje Aleksandryjski majak
Dy jon moža vyhladać nie zusim tak, jak u III st. da n.e.
11.05.2015 / 10:52
Rekanstrukcyja vyhladu majaka, 2006 hod. Vyjava: Emad Victor Shenouda via Wikimedia
Ułady Jehipta ŭzhadnili prajekt adnaŭleńnia adnaho ź siami antyčnych cudaŭ śvietu, Aleksandryjskaha majaka, paviedamlaje The Cairo Post.
Kopija histaryčnaha Aleksandryjskaha majaka maje być zbudavanaja na histaryčnym miescy — vostravie Faros u buchcie Aleksandryi. Adna prablema — niama nivodnaj vyjavy majaka časoŭ jaho isnavańnia.
Usie sučasnyja ŭjaŭleńni pra Aleksandryjski majak hruntujucca na piśmovych arabskich krynicach. Ź ich viadoma, što majak vyšynioj 120-137 mietraŭ składaŭsia z kvadratnaha ŭ siačeńni asnavańnia, vaśmihrannaj siaredniaj častki i kruhłaj viežy. Na viaršyni viežy ŭdzień funkcyjanavała vielizarnaje lusterka, unočy — vohnišča.
Jašče adna mahčymaja krynica infarmacyi pra majak — makiet Abusirskaha majaka, znojdzieny ŭ adnoj sa staražytnajehipieckich hrabnic. Niekatoryja navukoŭcy miarkujuć, što majak prajektavaŭsia jak pamienšanaja kopija Aleksandryjskaha.