Ksienii Sabčak pahražaje hod turmy za fota ŭ Instagram
04.06.2015 / 19:12
Śledčy kamitet Rasijskaj Fiederacyi praviadzie pravierku ŭ dačynieńni Ksienii Sabčak pa abvinavačvańni jaje ŭ abrazie pačućciaŭ viernikaŭ, pieradajuć rasijskija ŚMI sa spasyłkaj na kiraŭskaha jurysta Jarasłava Michajłava, jaki i padaŭ zajavu na žurnalistku.
@xenia_sobchak
30 maja juryst z Kiraŭskaj vobłaści Jarasłaŭ Michajłaŭ paviedamiŭ na svajoj staroncy ŭ Facebook, što za miesiac da hetaha paskardziŭsia na zdymak Ksienii Sabčak u Instagram. U im televiadučaja paziravała ŭ carkoŭnym adzieńni dla abradaŭ (ryzie), hałaŭnym ubory i nakładnoj baradzie. Zdymak źjaviŭsia ŭ siecivie jašče 30 krasavika.
Sabčak śćviardžała, što fota było źniata ŭ pracesie padrychtoŭki repartažu dla vydańnia «Snob». Što heta byŭ za repartaž, pakul nie viadoma.
Na dumku Michajłava, u dziejańniach Sabčak bačycca skład złačynstva, praduhledžanaha artykułam 148 kryminalnaha kodeksa RF «Parušeńnie prava na svabodu sumleńnia i vieravyznańniaŭ». Pa hetym artykule žurnalistcy moža pahražać da 300 tysiač rasijskich rubloŭ štrafu abo abmiežavańnie voli terminam na hod.
«Sabčak pierajšła miežy dazvolenaha i prademanstravała svajo hreblivaje staŭleńnie da asnoŭ Ruskaj pravasłaŭnaj carkvy jak apory Ruskaha śvietu», – ličyć Michajłaŭ.
Na dumku ž Sabčak, jaje fotazdymak nikoha nie abražaje. Pra heta jana napisała ŭ svaim akaŭncie ŭ Twitter.
«Ja tolki nie razumieju, čamu majo ścipłaje fota — abražaje, a fota toŭstych mužčyn, abviešanych zołatam i «Brehie» — upłyvaje dabratvorna», - adkazała jana.
Pa jaje słovach, adzieńnie śviatara pradajecca ŭ firmie «Karnavalnyja kaściumy».
«Viernikaŭ nie kranaje, što barada i załaty prykid pradajucca ŭ firmie «Karnavalnyja kaściumy»? Moža ich taksama sudzić, jak pradaŭcoŭ «zabaronienki»?» — piša Sabčak.
Jana taksama admaŭlaje, što dadzienaja sprava maje dačynieńnie da viery jak takoj.
«I jakoje NAOHUŁ heta ŭsio maje dačynieńnie da Viery? Nie vieryć u toje, što hetyja ludzi - staŭleniki Božyja, jašče nie značyć NIE vieryć u Boha», — vykazałasia viadučaja.