Skulpturu Džakamieci kupili za rekordnyja 141 młn dalaraŭ
«Čałaviek pakazvaje» stała samaj darahoj skulpturaj śvietu.
09.06.2015 / 12:29
«Čałaviek pakazvaje». Fota: oneadayphotograph.com
Skulptura 1947 hoda «Čałaviek pakazvaje» raboty šviejcarskaha majstra Albierta Džakamieci była pradadzienaja na aŭkcyjonie Christie’s 11 maja za rekordnuju sumu ŭ 141 młn dalaraŭ. Pakupnik tady pažadaŭ zastacca ananimnym, ale ciapier raskryŭ svaju asobu, piša Page Six.
Pakupnikom akazaŭsia 58-hadovy mieniedžar chedž-fondaŭ Styŭ Koen, 106-y bahaciej Ziamli ŭ śpisie Forbes. U minułym listapadzie jon ža nabyŭ za 101 młn inšuju skulpturu Džakamieci, «Kalaśnicu», adznačaje The Daily Mail.
Skulptura «Čałaviek pakazvaje» vykananaja z bronzy ŭ čałaviečy rost. «Heta adna z najvialikšych skulptur XX stahoddzia, — kaža art-dyler Uiljam Akavieła. — Styŭ heta vielmi sur’iozny, vielmi praniklivy kalekcyjanier. U jaho taksama jość pravilnyja instynkty, jakija z knih pa historyi mastactva nie zdabyć».
Jana daloka nie samaja darahaja pakupka Koena — u 2012-m jon nabyŭ na aŭkcyjonie karcinu Pikasa «Son» 1932 hoda za 155 młn dalaraŭ. Svajho «Snu» jon čakaŭ 6 hod — karcina restaŭravałasia, bo jaje papiaredni ŭładalnik parvaŭ jaje łokciem.
***
Styŭ Koen pačaŭ svaju kar’ieru z kapitałam u 7 tysiač dalaraŭ, siońnia ŭ jaho kišeni naličvajecca 11 młrd. Jaho sfiera dziejnaści — chedž-fondy, adzin z samych ryzykoŭnych šlachoŭ ŭ inviestavańni, sutnaść jakoha ŭ pakupcy niedaacenienych i prodažy pieraacenienych finansavych instrumientaŭ.