Šufucinski admianiŭ kancert la Mirskaha zamka. Zamiest jaho vystupiać Neuro Dubel i Akute
9.06.2015 / 14:13
Rasijski šansańje vymušany byŭ admovicca ad vystupu z-za śmierci žonki. Arhanizatary «Viečaroŭ la Mirskaha zamka» vyrašyli zamiest jaho viečaryny pravieści rok-kancert.
Usiaho za niekalki dzion da pačatku adnaho z kancertaŭ ź sieryi «Muzyčnyja viečary la Mirskaha zamka» arhanizatary z telekanała ANT sutyknulisia z prablemaj — zajaŭleny kancert Michaiła Šufucinskaha nie adbudziecca, bo ŭ śpievaka pamierła žonka. Zamiest hetaha vyrašana było zładzić rok-kancert. «My peŭnyja ŭ tym, što treba pieramahać abstaviny i dać mahčymaść vystupić našym rok-hurtam», — skazaŭ hienpradziusar ANT Siarhiej Chomič.
Arhanizatary zdoleli za karotki čas damovicca na vystup z tryma hurtami — Neuro Dubel, Akute i Nuteki. «My abrali najbolš cikavyja varyjanty z tych, što mieli i spadziajemsia, što słuchačy pryjduć na hety kancert žyvoj muzyki. Technična my da jaho absalutna hatovy», – zajaviŭ Siarhiej Chomič.
Kancert projdzie ŭ noč z 12 na 13 červienia (a dakładniej u hadzinu nočy 13 červienia). Kvitki — pa 100 000 rub.