Удава кампазітара Паліводы зноў забараніла спяваць «Маладзечна»
Песня не гучыць ужывую ўжо два гады.
10.06.2015 / 19:51
Жывое выкананне песні на фестывалі ў Маладзечне ў 2011 годзе.
XV Нацыянальны фестываль беларускай песні і паэзіі ў Маладзечне мусіла адкрыць песня на верш Леаніда Пранчака і музыку Ігара Паліводы «Маладзечна». Але выконваць яе чарговы раз забараніла ўдава кампазітара Вольга Палівода, паведамляюць Naviny.by.
Як распавяла рэдактар канцэрта-адкрыцця Людміла Палкоўнікава, удава кампазітара выстаўляе выключна фінансавыя патрабаванні.
Паводле яе слоў, Палівода раней выстаўляла да тэлеканала СТВ, што вёў запіс канцэрту, «няўздымныя фінансавыя патрабаванні», а арганізатарам канцэрту прапаноўвала «аказаць спонсарскую прапанову ў выглядзе прадукцыі аднога з прадпрыемстваў горада».
Арганізатары пайшлі на максімальныя ўступкі Паліводзе, сцвярджае Палкоўнікава, але першая то дазваляла, то забараняла выкарыстанне песні. Апошняя адмова паступіла за гадзіну да канцэрту.
Палівода раней патрабавала «непамерную суму» з «Беларускіх песняроў» за выкананне песні «А ў полі бяроза», згадваюць Naviny.by. У выніку песня перастала гучаць на канцэртах ансамбля.