U Biełarusi płanujecca stvaryć hieałahičnuju słužbu
26.06.2015 / 19:26
U Biełarusi nieabchodna stvaryć svaju hieałahičnuju słužbu, zajaviŭ novy ministr pryrodnych resursaŭ i achovy navakolnaha asiarodździa Andrej Kaŭchuta 26 červienia ŭ Minsku padčas jaho pradstaŭleńnia na pasadzie kalektyvu ministerstva.
Jak rastłumačyŭ Kaŭchuta žurnalistam, stvareńnie hieałahičnaj słužby daść mahčymaść pravieści analiz minieralna-syravinnaj bazy, acanić najaŭnyja ŭ Biełarusi zapasy karysnych vykapniaŭ i prafiesijna pravodzić hieołaharaźviedačnyja raboty.
Pavodle słoŭ ministra, Minpryrody maje namier skancentravacca na racyjanalnym i kompleksnym vykarystańni minieralna-syravinnych resursaŭ. «Ekanomika minieralnaj syraviny pavinna być pakładziena ŭ asnovu dziejnaści Minpryrody», — zaznačyŭ jon.
Kaŭchuta taksama paviedamiŭ, što płanujecca pierahledzieć strukturu ministerstva. «Varta ŭparadkavać strukturu Minpryrody, uklučajučy terytaryjalnyja padraździaleńni i padviedamasnyja arhanizacyi, i pa mnohich kirunkach skaardynavać svaju dziejnaść ź Ministerstvam ŽKH, Minbudarchitektury i Minekanomiki, Nacyjanalnaj akademijaj navuk, kancernam «Biełnaftachim», — skazaŭ ministr.
Kandydat hieołaha-minierałahičnych navuk Andrej Koŭchuta pryznačany ministram pryrodnych resursaŭ i achovy navakolnaha asiarodździa 25 červienia. Z 2004 hoda pracavaŭ namieśnikam dyrektara departamienta pa hieałohii Ministerstva pryrodnych resursaŭ i achovy navakolnaha asiarodździa, a raniej — u Instytucie hieałahičnych navuk Nacyjanalnaj akademii navuk, departamiencie pa hieałohii Minpryrody, Navukova-vytvorčym centry pa hieałohii.
Raniejšy kiraŭnik Minpryrody Uładzimir Całko zajmaŭ ministerskuju pasadu z červienia 2009 hoda pa 27 śniežnia 2014-ha. Jon byŭ adpraŭleny ŭ adstaŭku razam ź inšymi ŭradavymi čynoŭnikami i premjer-ministram Michaiłam Miaśnikovičam.