Mocart, tanha, baroka, Ahinski i mała milicyi: što kali na Viečarach kłasičnaj muzyki pad Ratušaj
Čatyry suboty zapar z 8 da 10 viečara na płoščy Svabody.
08.07.2015 / 13:57
Uśled za džazavymi viečarami ŭ Minsku projduć viečary kłasičnaj muzyki. Farmat praktyčna toj ža: subota, viečar, płošča Svabody, biaspłatny ŭvachod. U sieradu, 8 lipienia, arhanizatary viečaroŭ kłasičnaj muzyki raspaviali ŭsie padrabiaznaści pra hetyja i mahčymyja budučyja mierapryjemstvy.
Čytajcie padrabiaźniej: Viečary kłasičnaj muzyki adrepietavali na dachu velcom
Raskład viečaroŭ kłasičnaj muzyki:
11 lipienia: uryŭki z samych viadomych tvoraŭ Mocarta, Štraŭsa i inšych ŭ vykanańni arkiestra Muzyčnaha domu «Kłasika» pad kiraŭnictvam Ivana Kaściachina. Płanujecca, što na «aŭstryjskim» kancercie zahučyć navat alpijski roh! Sačycie za prahnozam nadvorja, moža być prachałodna i daždžliva.
18 lipienia: tango Nuevo, muzyka Astora Pjacoły i najlepšyja tanha-šlahiery ŭ vykanańni ansambla V.S.O.P. Arhanizatary kažuć, što mnohija tanha ŭžo možna śmieła pryličvać da kłasičnaj muzyki. Na viečary ŭsich naviednikaŭ zaprašajuć tančyć, dla majstroŭ tanha budzie zładžanaja asobnaja placoŭka.
25 lipienia: muzyka baroka, «Žart» Bacha, «Čatyry siezony» Vivaldzi i inšaje ŭ vykanańni ansamblu «Partyta», vakalnyja šlahiery ŭ vykanańni salistki Vialikaha teatra Taćciany Haŭryłavaj i inšaje.
1 žniŭnia: kancert u honar 250-hodździa Michała Kleafasa Ahinskaha. Tvory słavutaha kampazitara, jaho nastaŭnikaŭ i paśladoŭnikaŭ vykanajuć ansambl «Kantabile» i prajekt «Epocha Kniazia Michała Kleafasa». Asablivaj detallu kancertu stanie rekanstrukcyja kaściumavanaha bału prosta pad Ratušaj.
Usie čatyry kancerty na płoščy Svabody pačnucca a 8-j viečara i zavieršacca kala 10-j. Uvachod volny. Arhanizatary abiacajuć, što miery achovy paradku nie buduć praźmiernymi.
Čytajcie taksama:
30 muzyčnych festaŭ blizkaha i dalokaha zamiežža