Kaciaryna Kibalčyč pra «Barysaŭ-Arenu»: Pachnie hnojem, a hledačy — hopniki

Abmiarkoŭvajcie!

13.08.2015 / 07:54

Žurnalistka rasijskaha Pieršaha kanała Kaciaryna Kibalčyč u paniadziełak, 10 žniŭnia, naviedała matč BATE — «Dynama» Minsk na «Barysaŭ-Arenie». Svaimi ŭražańniami jana padzialiłasia ŭ fejsbuku.

fota sa staronki Kaciaryny Kibalčyč u fejsbuku

«Učora [u paniadziełak] upieršyniu pabyvała na Arenie ŭ Barysavie i, mabyć, heta samy pryhožy stadyjon, jaki sustrakaŭsia mnie ŭ žyćci. Staić takaja latajučaja talerka. A vakoł — les, dalej chaty, hnojem pachnie. Cud.

Ale jašče macniej uraziła kłasavaja nianaviść na trybunach. Hulajuć «Dynama» Minsk i BATE Barysaŭ. Ujavicie karcinu. Miascovyja dziaŭčaty (ustrojenyja i razmalavanyja, na špilkach), mužyki, baby, dzieci (pry baćkach) — usie ŭ hołas kryjuć matam minskuju kamandu, aśvistvajuć (asabliva čarnaskurych dynamaŭcaŭ), nazyvajuć piaciarych minskich dziadźkoŭ-zaŭziataraŭ (jany ŭ sinich šalikach) kazłami («vali ŭ Minsk svoj»). Kali futbalist «Dynama» atrymlivaje traŭmu — trybuna ŭ radasnym zachapleńni, niby zabili hoł. Heta nie fanaty, a prosta narod, miascovyja žychary.

Ja na futboł naohuł redka chadžu. Nie viedaju, moža tak i treba? Moža časta tak??

Ale ŭsio roŭna nie zrazumieła. Voś uziać Barysaŭ — svaja mocnaja kamanda, Saša Hleb hulaje, kruty stadyjon, rehijon nie biedny. A pavodziać siabie, jak pakryŭdžanyja hopniki. Jak byccam i praŭda talerku stadyjona ŭ lesie zabyłasia inšaja cyvilizacyja. Nu, i Minsk učora vyjhraŭ 1:0.»

Dopis Kibalčyč vyklikaŭ abmierkavańnie ŭ fejsbuku, učapilisia za hnoj, mat na rasijskich stadyjonach, adkazaŭ joj i hałoŭny redaktar Tribuna.com Maksim Bierazinski.

«Niechta Kibalčyč dva razy pisała pra sport i dva razy napisała niesuśvietnuju łuchtu. Kandełaki, Kibalčyč, chto nastupny? Časam lepš prastahnać prapahandu na Pieršym. Nie čapajcie vy jašče i futboła», — napisaŭ Bierazinski.