Finalistka «Zaśpiavaj 2.0» Valeryja Dele vystupić razam z ili-ili
28.08.2015 / 11:45
28 žniŭnia ŭ dvoryku na płoščy Svabody, 4 vystupić Valeryja Dele, a hościem budzie hurt ili-ili, u skład jakoha ŭvachodziać akciory Kupałaŭskaha teatra Michaś Zuj, Źmicier Jasienievič i Pavał Jaskievič.
20-hadovaja Valeryja Dele naradziłasia i vyrasła ŭ Biełarusi, a proźvišča joj dastałosia ad baćki, jaki pachodzić z Etyjopii. Paśla skančeńnia škoły jana zacikaviłasia sučasnaj biełaruskaj muzykaj. Pryznajecca, što jaje pieršaja luboŭ — pieśnia «Kaniušnia» ŭ vykanańni:B:N:. Paśla taho, jak Valeryja patrapiła na «Śpieŭny schod», jaki ładzić Siaržuk Doŭhušaŭ z hurta Vuraj, jana adkryła dla siabie bahaćcie biełaruskaha folku. Asabliva začaravałasia pieśniaj «Usie łuhi», jakuju pačuła ŭ vykanańni hurta Kriwi.
«Hetuju pieśniu ja maryła zaśpiavać užo daŭno, tamu pačuŭšy pra «Zaśpiavaj 2.0», adrazu vyrašyła, što budu prymać udzieł. Ja paprasiła maich siabroŭ-kapaejrystaŭ mnie dapamahčy i ŭ vyniku u nas atrymaŭsia niejki biełaruska-brazylska-ŭschodnie-afrykanski miks. Zapis, viadoma nie idealny, ale jon staŭ uvasableńniem majoj mary zrabić hetuju pieśniu». U vyniku z svajoj viersijaj pieśni «Usie łuhi» Valeryja trapiła ŭ finał «Zaśpiavaj 2.0» u naminacyi «Kaver».
U finalnaj sieryi kancertaŭ «Zaśpiavaj 2.0» Valeryju Dele padtrymaje svaim vystupam hurt ili-ili. Tryjo aktoraŭ Kupałaŭskaha teatru ŭziała ŭ padmacoŭku žyvuju rytm-sekcyju, kab stvaryć adzin z samych mahutnych i ramantyčnych albomaŭ apošnich hadoŭ u biełaruskaj muzycy pad nazvaj «list», kudy ŭvajšli takija pieśni jak «Tančyć», «Sercy», «Budzie jak budzie». Hurt syhraje ŭ hety viečar svaje hałoŭnyja hity i pakaža zusim novyja tvory.
Pa vyniku letnich kancertaŭ maładych vykanaŭcaŭ buduć vyznačanyja pieramožcy konkursu «Zaśpiavaj 2.0», jaki pravodzić partał Tuzin.fm i fond «Viartańnie» pry padtrymcy kampanii «Budźma biełarusami!». Pryzavy fond konkursu składaje 1000 eŭra.