«Mama», Re1ikt i Akute stali pieramožcami miehaturaŭ-2015
28.08.2015 / 11:48
Na Tuzin.fm prajšło padsumavańnie vynikaŭ muzyčnaha sezonu 2014-2015. Pieśniaj hodu stała «Budź złoj» ad hurta «Mama», klipam – «Čaho ty, łosia» hurtu Re1ikt, albomam – «Reaĺnaść i sny» hurtu Akute.
Va ŭsich troch čartach baraćba za pazycyju lidera išła da apošnich chvilinaŭ hałasavańnia. U aŭdyjočarcie ŭ dvuboju syšlisia mahiloŭcy – Angst, prajekt paeta Vitala Ryžkova, i «Mama» – novy hurt Jana Maŭzera (na fota). Pa vyniku pieramohu atrymała pieśnia «Budź złoj», jakaja nabrała 1035 hałasoŭ (va ŭmoŭnaha supiernika – 996). Heta druhaja pieśnia kamandy, u jakuju akrom Maŭzera ŭvajšli daśviedčanyja muzyki: hitaryst Siarhiej Nikałajčanka (hraŭ u hurcie Anžaliki Ahurbaš, mieŭ prajekt «Virtualnyja technalohii»), basist Uładzimier Razvadoŭski (hraŭ u Łarysy Hrybalovaj, hurcie Yellow Brick Road, a ciapier u «Biez bileta»), bubnač Arciom Kryščanovič («Tezaŭrus», «Skimen»), a taksama paplečnik Jana pa hurcie Mauzer – Uładzimier «Kolxz» Sieladcoŭ (klavišy, zapis). Uvosień hurt maje namier dać pieršy kancert.
Poŭnaj niečakanaściu možna nazvać pieramohu ŭ videačarcie klipa «Čaho ty, łosia» hurtu Re1ikt, jakija nie byli ŭ liku favarytaŭ.
Ciaham sezonu lidziravaŭ klip Źmitra Vajciuškieviča «Dačakajsia, matula», jaki sastupiŭ pazycyju lidera tolki dvojčy za ŭvieś čas. Ale ŭ mehatury napierad vyrvaŭsia «Łosia» i «As Bas» hurtu Irdorath. U Re1ikt pa vyniku apynułasia bolš aktyŭnych i zaciatych prychilnikaŭ, dziakujučy jakim nabrałasia 566 hałasoŭ (u ich umoŭnych supiernikaŭ – 557). Klip na narodnuju pieśniu «Čaho ty, łosia» źniaŭlider i kamandy Aleś Dziemidzienka. Zdymki adbylisia ŭ Łošyckim parku na śvitanku, a akrom muzykaŭ u videa možna pabačyć biełaruskuju abradavuju lalku – akurat takija časam razyhryvajucca na kancertach «Žyvy Tuzin». Admietnaja praca jašče i tym, što ŭ jaje nie było ŭkładziena ani rubla.
U albomnym čarcie ŭ dvuboju syšlisia TonqiXod z debiutnikam «Pradmova», jaki ŭziaŭ užo ŭsie mahčymyja pryzy na ŭznaharodach Experty.by i treci numarny dysk hurta Akute – «Reaĺnaść i sny». Pieramoha – za hurtom Stasa Mytnika i Romy Žyharava: 361 hołas suprać 345. Pa vychadzie najlepšaha albomu sezonu Tuzin.fmnapisaŭ, što muzyki ŭ im ničoha revalucyjnaha nie prapanoŭvajuć jak u tematyčnym, tak i ŭ muzyčnym planie.Jany trymajucca svajho adnojčy znojdzienaha stylu, i pakul heta nie dakučaje. Niama tut adčuvańnia zaježdžanaj kružełki, jakoje byvaje, kali muzyka kožny raz ekspluatuje adzin i toj ža vobraz praz tvorčuju niedziejazdolnaść. U tym liku dziakujučy tamu, što muzyki kštałtujuć svajo majsterstva i pavyšajuć kožny raz svaje patrabavańni da ahulnaha saŭndu, tamu ich novyja pieśni hučać jašče bolš adtočana i nasyčana.