Абвінавачаны ў гвалце папскі нунцый памёр да пачатку суда
28.08.2015 / 12:39
Былы пасланнік Ватыкана ў Дамініканскай рэспубліцы Ёзэф Весалоўскі, абвінавачаны ў гвалце над дзецьмі і пазбаўлены сану, памёр у ноч на пятніцу перад пачаткам судовага працэсу па ягонай справе.
67-гадовы Весалоўскі раней адчуваў праблемы са здароўем, з-за якіх у ліпені суд над ім быў перанесены.
Арцыбіскупа адклікалі з пасады нунцыя ў мінулым годзе пасля паведамленняў СМІ пра тое, што ён здзяйсняў гвалт у дачыненні да хлопчыкаў-падлеткаў у Дамініканскай Рэспубліцы.
Да гэтага часу Весалоўскі адпрацаваў у Санта-Дамінга больш за пяць гадоў.
Папа Рымскі Францішак актыўна заклікаў каталіцкую царкву да рашучых дзеянняў па выкараненні педафіліі сярод святароў ва ўсім свеце і пакаранню усіх вінаватых.
У мінулым годзе папа Францішак параўнаў ўчынкі такіх людзей з сатанінскай імшой. Ён таксама дамогся прыняцця Ватыканам больш строгіх законаў у дачыненні да такіх злачынстваў.