JEEK, kudy ŭvachodzić Biełaruś, moža ŭvieści padatak na zamiežnyja interniet-pakupki
23.11.2015 / 12:26
Rada Jeŭrazijskaj ekanamičnaj kamisii (JEEK) u paniadziełak, 23 listapada, abmiarkuje varyjanty mahčymaha pavyšeńnia zboraŭ transhraničnaha internet-handlu, piša «Kommiersant». U JEEK uvachodziać Rasija, Biełaruś, Kazachstan, Armienija i Kyrhyzstan.
Surazmoŭca raspavioŭ, što Rada razhledzić varyjanty rehulavańnia impartu tavaraŭ, jakija byli nabytyja ŭ zamiežnych internet-kramach.
Rabočaja hrupa pa pytańniach elektronnaha handlu padrychtavała dva prajekty.
Pieršy prapanuje vyzvalić ad mytnych płaciažoŭ tavary, košt jakich mienšy za 22 jeŭra, a vaha nie pieravyšaje adnaho kiłahrama. Za pasyłki ad adnaho i da dziesiaci kiłahramaŭ i košt 22—150 jeŭra prapanujuć płacić zbor 15 jeŭra. Tavary koštam bolš za 150 jeŭra i masaj 10 i bolš kiłahram, pavodle hetaha varyjantu, zapatrabujuć zboru ŭ pamiery 15 jeŭra plus 30 pracentaŭ ad mytnaha koštu, ale nie mienš za 4 jeŭra za adzin kiłahram.
Pavodle druhoha varyjantu, usie tavary koštam da 150 jeŭra i vahoj da 10 kiłahramaŭ buduć abkładać zboram u 10 jeŭra. U vypadku, kali mytny košt pasyłak pieravyšaje 150 jeŭra, a vaha składaje bolš za 10 kiłahram, zbor składzie 10 jeŭra plus 30 pracentaŭ ad koštu pakupki, ale nie mienš za čatyry jeŭra za adzin kiłahram.
U Jeŭrazijskaj ekanamičnaj kamisii paćvierdzili abmierkavańnie pytańnia.
«Kazać pra toje, što na im buduć pryniatyja niejkija kankretnyja pastanovy ci rezalucyi, nielha: rada JEEK budzie abmiarkoŭvać situacyju, a da jakoha rašeńnia pryjdzie i ci pryjdzie — kazać rana», — skazali ŭ JEEK.