У ЗША вывелі камара з частковым імунітэтам да малярыі
24.11.2015 / 10:02
Навукоўцы ў ЗША вывелі генетычна мадыфікаванага камара з частковым імунітэтам да малярыі. Як кажуць даследнікі, калі новая асобіна будзе здольнай размнажацца ў натуральных умовах, гэта дапаможа істотна паменшыць колькасць заражэнняў малярыяй сярод людзей.
Геннамадыфікаваныя камары могуць перадаваць ген «супраціву» малярыі свайму нашчадку. Камары з гэтым генам заражаюцца хваробай, але не перадаюць яе чалавеку пры ўкусе.
Даючы патомства ў натуральных умовах, камары павінны паступова распаўсюдзіць гэты ген на ўсю папуляцыю насякомых, спадзяюцца навукоўцы. Эксперыменты паказалі, што ген перадаецца па спадчыне амаль у 100% выпадкаў, на тры пакаленні наперад.
Камары з роду анафелес — асноўныя пераносчыкі малярыі. Па дадзеных Сусветнай арганізацыі аховы здароўя, у свеце ад малярыі штогод паміраюць больш за паўмільёна чалавек. У 2012 годзе ад яе памерлі 627.000 чалавек. Большая частка заражэнняў прыходзіцца на Афрыку.