Ваўкі супраць паляўнічых. Сёння: матч Лігі чэмпіёнаў «Рома» — БАТЭ
якім будзе лік?
09.12.2015 / 07:44
29 верасня БАТЭ перамог з лікам 3:2
Сёння барысаўскі БАТЭ правядзе заключны матч групавога раўнду футбольнай Лігі чэмпіёнаў. У Рыме барысаўскі клуб згуляе супраць «Ромы». Пачатак у 22:45. Трансляцыя на «Беларусь-2», або на сайце tvr.by.
29 верасня БАТЭ выйграў у Барысаве з лікам 3:2 (пасля першага тайма лік быў 3:0, а калі пераможа сёння, то гарантавана трапіць або ў 1/8 фіналу Лігі чэмпіёнаў, або ў 1/16 Лігі Еўропы.
Становішча камандаў: Барселона — 13, Баер, Рома — 5, БАТЭ — 4.
Сёння ў Леверкузэне таксама гуляюць «Баер» — «Барселона».
На перадматчавай прэс-канферэнцыі ў галоўнага трэнера БАТЭ Аляксандра Ермаковіча спыталі:
— Трэнер «Ромы» сказаў, што для перамогі трэба, каб на полі было 11 ваўкоў і яшчэ 18 ваўкоў на лаўцы. Не страшаць такія заявы?
— Не, не страшаць, Трэнер матывуе сваю каманду. Мы разумеем важнасць гэтай гульні. Усе сродкі добрыя. Мы можам сказаць, што ў нашых лясах таксама ёсць ваўкі.
— І добрыя паляўнічыя, — дадаў прэс-аташэ БАТЭ Сяргей Дашкевіч.