Sprava dački Hieraščankaŭ i Lusi Łuščyk: pazicyi suda i taty
09.12.2015 / 12:13
Skandalnaje videa, na jakim televiadučaja Lucyja Łuščyk kaža niepryjemnyja słovy žančynie ŭ prysutnaści jaje dački, vyklikała vialiki rozhałas. Na roliku byłyja muž i žonka Iłona i Andrej Hieraščanki kanfliktujuć z-za dziciaci. Biznesmien, siońniašni muž televiadučaj, praz sud zabraŭ 8-hadovuju dačku da siabie. Iłona Hieraščanka śćviardžaje, što joj praktyčna nie dazvalajuć bačycca ź dziciem i nastojvaje, kab sud pierahledzieŭ rašeńnie. Žančyna źviarnułasia ź listom u Administracyju prezidenta i raspačała zbor podpisaŭ pad pietycyjaj na sajcie Change.org, choć apošniaje nie maje jurydyčnaj siły ŭ Biełarusi.
Čamu sud pakinuŭ dačku z tatam?
U matyvacyjnaj častcy pastanovy suda Centralnaha rajona Minska za 25 traŭnia 2015 hoda tłumačycca:
Pa-pieršaje, dziaŭčyncy, na dumku sudździ, lepš žyć u vialikaj kvatery taty (piacipakajoŭka płoščaj kala 257 m2). Maci dziaŭčynki taksama maje ŭłasnaje žyllo ŭ staličnym navabudzie (trochpakajoŭka płoščaj kala 115 m2). Na čas ramontu Iłona Hieraščanka źniała inšaje žyllo. Takuju situacyju sud razhledzieŭ nie na karyść mamy.
Druhi momant: da śniežnia 2014 hoda dziaŭčynka žyła ŭ Maskvie i vučyłasia ŭ Brytanskaj mižnarodnaj škole, siertyfikat jakoj nie pryznajecca ŭ Biełarusi, u našaj krainie treba zdavać dadatkovyja ispyty. U Minsku ž baćka addaŭ dziaŭčynku na navučańnie ŭ himnaziju.
Treci momant: na dumku suda, dziaŭčynka bolš schilajecca da baćki.
U sudovaj pastanovie nie ŭdakładniajecca, jak časta žančyna moža bačycca z dačkoj. Ciapier idzie inšy sudovy praces, jaki pavinien vyznačyć hety hrafik. Rašeńnie nakont miesca žycharstva dački mama asprečvaje i dajšła da Viarchoŭnaha suda.
Viersija maci
Zasnavalnica i kiraŭnik dziciačaha adukacyjnaha centra Iłona Hieraščanka raspaviadaje, što vyjšła zamuž za biznesmiena Andreja Hieraščanku ŭ 2006 hodzie. U ich naradziłasia dačka. Siamiejnaje žyćcio nie załadziłasia.
U śniežni 2011 hoda Iłona razam z dačkoj źjechała ŭ Maskvu. Praz paŭhoda muž sam padaŭ na razvod. U kopii iskavoj zajavy jon uziaŭ vinu za raspad siamji na siabie:
«Sumiesnaje žyćcio nie skłałasia całkam pa majoj vinie. Ja nie suprać taho, kab paśla skasavańnia šlubu dzicia pražyvała z mamaj».
Byłyja muž i žonka jurydyčna damovilisia pra paradak sustrečaŭ z dačkoj. Dziaŭčynka žyła na dva harady. Pa słovach Iłony, dzicia mieła mahčymaść rehularna sustrakacca z baćkam, pravodziła ź im amal pałovu svajho žyćcia.
U Maskvie dziaŭčynka ź piaci hadoŭ navučałasia ŭ Brytanskaj mižnarodnaj škole. I kali ŭzrost dački pačaŭ nabližacca da siami hadoŭ, kanflikt pamiž Iłonaj i byłym mužam pačaŭ abvastracca. 20 śniežnia 2014 hoda padčas školnych kanikułaŭ mama pryviezła dzicia ŭ Minsk. Z taje pary, pa jaje słovach, sustrakacca z dačkoj sam-nasam joj nie dajuć.
«Były muž — adzin z samych paśpiachovych biznesmienaŭ krainy. Ź im časta sustrakalisia vielmi ŭpłyvovyja i viadomyja ludzi. Jon šmatrazova zajaŭlaŭ, što ŭ hetaj krainie jon moža ŭsio i što mnie lepš nie supraciŭlacca i rabić tak, jak nieabchodna i zručna jamu, — raspaviadaje Iłona Hieraščanka. — Maje pravy nie zmahli abaranić ni sudovyja vykanaŭcy, ni milicyja, ni orhany apieki. Usie adkazvali, kab ja źviartałasia ŭ sud. A ŭ sudzie były muž zapeŭnivaŭ, što nijakim čynam nie pieraškadžaje maim znosinam z dačkoj. Śćviardžaŭ, što ja ŭsio prydumlaju. Jon rabiŭ usio mahčymaje, kab ja nie mieła mahčymaści zastavacca z dačkoj sam-nasam, maje znosiny ź joj možna paličyć pa chvilinach. Siońnia były muž prama kaža, što ŭ lepšym vypadku ja budu bačycca z dačkoj u jaho prysutnaści. Što majecca na ŭvazie pad słovami «ŭ horšym vypadku» — zastajecca tolki zdahadvacca. Były muž patrabuje, kab ja mahła pravodzić z dačkoj usiaho 8 dzion na miesiac. Tak abychodziacca tolki z apošnimi ałkahaličkami! Ja hatovaja pajści i na takija ŭmovy dziela dački. Adnak ciapier i hetyja ŭmovy nie zadavalniajuć byłoha muža».
Jeŭraradyjo: Ci hatovyja vy kančatkova viarnucca ŭ Minsk z Maskvy?
Iłona Hieraščanka: Naturalna, ja ŭžo z sakavika žyvu ŭ Minsku. Heta pryncypovy momant. Moj hramadzianski muž razumieje situacyju. Dziakuj Bohu, ź siamjoj mnie pašancavała. Jany razumiejuć, što dzicia dla maci — samaje kaštoŭnaje.
Viersija baćki
Andrej Hieraščanka admaŭlajecca razmaŭlać pra hetu historyju:
«Na ŭsie pytańni ab sapraŭdnym stanie spraŭ vam padrabiazna adkažuć u adździele sacyjalnaj apieki Centralnaha rajona i ŭ rajonnym sudzie. Kali vas niešta cikavić, źviarniciesia tudy, i tady vy zmožacie zrazumieć, što adbyvajecca. Zrazumieła tłumaču?»
Tym nie mienš, kab vykłaści pazicyju mužčyny, spašlemsia na jaho piśmovyja tłumačeńni, jakija padavalisia ŭ sud Centralnaha rajona Minska sioleta ŭ krasaviku.
U dakumiencie biznesmien raspaviadaje pra toje, jak kłapaciŭsia pra dačku ciaham usiaho jaje žyćcia. Naprykład, adpraŭlaŭ na lačeńnie ŭ Vienu. A padčas epidemii hrypu 2009 hoda — u Dubaj. Da taho ž najmaŭ dla vychavańnia dački nianiu, što tłumačyŭ imknieńniem byłoj žonki da prafiesijnaha raźvićcia.
«Ja nieadnarazova naziraŭ, jak iściec (Iłona Hieraščanka, — Jeŭraradyjo) sychodziła z doma, pakidajučy našu dačku ŭ ślazach. Takija pavodziny istca byli dla mianie niezrazumiełyja. Ja šmat razoŭ kazaŭ Hieraščanka I.H. pra toje, što navat samaja lepšaja niania nie moža zamianić maci, što dačka pakutuje ad takich jaje pavodzinaŭ. Adnak maje ŭhavory nie dali vyniku», — skazana ŭ piśmovych tłumačeńniach.
U dakumiencie raśpisvajecca i viersija Andreja Hieraščanki nakont kanfliktu ŭ himnazii (incydent trapiŭ u skandalny videazapis). Z punktu hledžańnia biznesmiena, nie jon pieraškadžaŭ mamie abniać dačku, a mama siłaj adryvała ad jaho dziaŭčynku i padrała kašulu.
Abvinavačvańni ŭ adras Iłony Hieraščanki ciahnucca staronkami.
«Ja paviedamiŭ Hieraščanka I.H., što pierajezd dački na pastajannaje miesca žycharstva ŭ Maskvu nie adpaviadaje damoŭlenaściam, dasiahnutym raniej, i supiarečyć intaresam dziciaci. Dzicia faktyčna było vyvieziena na terytoryju inšaj dziaržavy biez uzhadnieńnia sa mnoj», — siarod inšaha skazana ŭ dakumiencie.
Kampietentny śpiecyjalist, jaki zajmajecca pytańniami apieki ŭ Administracyi Centralnaha rajona Minska, admoviłasia prakamientavać situacyju: pišycie aficyjny zapyt.
Dačka, maci i baćka razam projduć praz ekśpiertyzu
U Dziaržaŭnym kamitecie sudovych ekśpiertyz śpiecyjalisty daśledujuć usich udzielnikaŭ sudovaha pracesu.
Supracoŭniki Upraŭleńnia składanych sudova-psichijatryčnych ekśpiertyz pavinny vyśvietlić indyvidualnyja asablivaści dački, mamy i taty i stupień pryviazanaści dziaŭčynki da kožnaha z baćkoŭ. Urešcie ekśpierty padrychtujuć rekamiendacyju: jak časta maci moža bačycca z dačkoj.
«Zrazumieła, u daśledavańni ŭličvajucca ŭsie akaličnaści. U tym liku toje, z kim dziaŭčynka pražyvaje na dadzieny momant. Ekśpierty adkazvajuć na pytańni, jakija stavić sud. Na padstavie hetaha vynosicca abjektyŭnaje zaklučeńnie. Jakaja situacyja jość na dadzieny momant, takoj jana i budzie adlustravana ŭ zaklučeńni ekśpierta», — zapeŭnivajuć va ŭpraŭleńni.
Pakul Andrej Hieraščanka zachoŭvaje maŭčańnie, jaho byłaja žonka Iłona praciahvaje dabivacca svajoj praŭdy i ŭžo dasłała zvarot na imia kiraŭnika Biełarusi. Miarkujučy pa vykładzienym u internet videazapisie, ich maleńkaja dačka uvieś čas sprabuje pamiryć baćkoŭ.