Дазваляць хварэць 3 дні без бальнічнага пакуль не збіраюцца
16.12.2015 / 17:52
У Беларусі пакуль не плануюць дазваляць хварэць 3 дні без афармлення ліста непрацаздольнасці. Аб гэтым паведаміў журналістам першы намеснік міністра аховы здароўя Дзмітрый Піневіч.
Дзмітрый Піневіч адзначыў, што цяпер калектыўныя дагаворы рэкамендуюць гэту норму. Калі чалавек захварэў, наймальнік у прыватнай кампаніі мае права адпусціць супрацоўніка падлячыцца без афармлення ліста непрацаздольнасці. Заканадаўча гэту норму пакуль замацоўваць не плануецца.
Больш таго, паводле слоў першага намесніка міністра, адпаведная практыка ў Германіі паказала, што некаторыя грамадзяне злоўжываюць гэтым правам і часам беспадстаўна карыстаюцца прадастаўленай магчымасцю.
Нагадаем, выдаваць бальнічныя лісты дазволілі прыватным медцэнтрам.