WSJ: Dzieviać rasijskich kantraktnikaŭ zahinuli ŭ Siryi padčas abstrełu
20.12.2015 / 13:52
Ilustracyjnaje fota yalibnan.com: rasijskija vajskoŭcy ŭ Siryi.
Dzieviać kantraktnikaŭ zahinuli padčas artyleryjskaha abstrełu ich bazy ŭ Zachodniaj Siryi, choć aficyjnyja ŭłady Rasii nie pryznajuć ich hibieli, śćviardžaje vydańnie The Wall Street Journal.
Artykuł maskoŭskaha karespandenta WSJ Tomasa Hruva, jaki spasyłajecca na ŭłasnyja krynicy, apublikavany na sajcie vydańnia.
WSJ śćviardžaje, što incydent adbyŭsia jašče ŭ kastryčniku. Zahinułyja aficyjna nie słužać u rasijskaj armii. U Siryi jany vykonvali funkcyi achovy peŭnych dziaržaŭnych abjektaŭ.
Pad abstreł trapiła tak zvanaja «hrupa Vahniera», nazvanaja pa psieŭdanimie ich kiraŭnika, byłoha vajskoŭca, jaki ŭdzielničaŭ u šerahu uzbrojenych kanfliktaŭ paśla raspadu SSSR. Vydańnie śćviardžaje, što hrupa nazyvałasia OSM, ale nie pryvodzić rasšyfroŭki hetaj abrevijatury.
Śćviardžajecca, što heta hihanckaja arhanizacyja. Jak śćviardžaje adna z krynic, u joj pracuje kala tysiačy čałaviek. Arhanizacyja, pavodle źviestak žurnalista, maje štab-kvateru ŭ Krasnadary. Vydańnie pryvodzić acenku rasijskaha vajskovaha ekśpierta Ivana Kanavałava, jaki śćviardžaje, što «hrupa Vahniera» źjaŭlajecca samaj paśpiachovaj sprobaj Rasiei stvaryć niedziaržaŭnuju arhanizacyju z vajennymi zadačami, anałah amierykanskaj Blackwater.
The Wall Street Journal miarkuje, što «hrupa Vahniera» była zadziejničana taksama ŭ hibrydnaj vajnie Rasii na ŭschodzie Ukrainy,
Vydańnie nie atrymała adkazu Minabarony RF na zapyt adnosna hetaj infarmacyi.