U Brusieli iduć dyskusii pa pytańni sankcyj u dačynieńni da Biełarusi
04.02.2016 / 17:02
U Jeŭrasajuzie aktyvizavałasia dyskusija pra dalejšy los abmiežavalnych mier u dačynieńni da Biełarusi. Takuju vysnovu možna zrabić z adkazaŭ źniešniepalityčnych viedamstvaŭ krain JES na prośbu BiełaPAN paviedamić ab pazicyi svaich dziaržaŭ pa hetym pytańni.
Tak, pres-sakratar MZS Łatvii Rajmand Jansans paviedamiŭ, što na hetym tydni ŭ Brusieli pačalisia dyskusii pa pytańni sankcyj u dačynieńni da Biełarusi. Łatvija, pavodle jaho słoŭ, pazityŭna aceńvaje zachady, zroblenyja biełaruskim bokam pa palapšeńni adnosin ź JES. «Saśpieła situacyja dla pierahladu sankcyj u dačynieńni da Biełarusi. Hety punkt hledžańnia my budziem adstojvać i ŭ Brusieli», — skazaŭ Jansans.
U departamiencie infarmacyi i suviaziaŭ z hramadskaściu MZS Litvy padkreślili: «Vyzvaleńnie palitviaźniaŭ u Biełarusi ŭžo dazvoliła prypynić i, chočacca vieryć, u samaj najbližejšaj pierśpiektyvie zrobić mahčymaj admienu abmiežavalnych mier u dačynieńni da fizičnych i jurydyčnych asobaŭ Biełarusi (za vyklučeńniem mier u dačynieńni da asob, jakija datyčnyja da źniknieńniaŭ apazicyjnych palitykaŭ u 1999—2000 hadach, i embarha na pastaŭki ŭzbrajeńnia)».
Litva, adznačyli ŭ MZS, cenić «zbałansavany padychod biełaruskich uładaŭ pa niepryznańni rasijskaj anieksii Kryma i «niezaležnaści» sieparatysckich režymaŭ u Paŭdniovaj Asiecii i Abchazii», rolu Biełarusi va ŭrehulavańni kanfliktu va Ukrainie, a taksama zachady, pryniatyja Minskam u apošnija hady pa ŭmacavańni adnosin ź JES. Da takich zachadaŭ litoŭskaje MZS adniesła «pačatak pieramovaŭ pa pahadnieńniach ab spraščeńni vizavaha režymu i readmisii, partniorstvie pa mabilnaści, padpisańnie pahadnieńnia ab supracoŭnictvie ŭ miechaniźmie rańniaha papiaredžańnia ŭ enierhietyčnym siektary i dalejšy inicyjatyŭny ŭdzieł Biełarusi va Uschodnim partniorstvie».
Adnak, na dumku Litvy i mnohich inšych dziaržaŭ — členaŭ JES, «hetyja zachady nie vyrašajuć usich prablem Biełarusi ŭ halinie pravoŭ čałavieka», padkreślili ŭ litoŭskim MZS. «Jašče nie reabilitavanyja byłyja palitviaźni; vybary (prezidenckija vybary 11 kastryčnika 2015 hoda), pavodle acenak BDIPČ, nie adpaviadali mižnarodnym demakratyčnym standartam; da hetaha času ŭ krainie prymianiajecca śmiarotnaje pakarańnie; stroha abmiažoŭvajecca i prama kantralujecca z boku ŭładaŭ dziejnaść niaŭradavych arhanizacyj, srodkaŭ masavaj infarmacyi, palityčnaj apazicyi», — kanstatuje źniešniepalityčnaje viedamstva Litvy. JES čakaje dalejšych pazityŭnych krokaŭ z boku Biełarusi ŭ halinie adkrytaści i demakratyzacyi, padkreślili ŭ MZS.
Tam taksama adznačyli, što «kanstruktyŭnyja adnosiny pamiž JES i Biełarussiu spryjaiuć umacavańniu dvuchbakovaha dyjałohu Litvy i Biełarusi». «Adnak na siońniašni dzień jość niavyrašanyja surjoznyja prablemy, źviazanyja z budaŭnictvam Astravieckaj AES u niepasrednaj blizkaści ad litoŭskaj stalicy i parušeńniem mižnarodnych standartaŭ atamnaj biaśpieki, z damovaj pa małym pryhraničnym ruchu, jakaja nie ŭvajšła ŭ siłu, ź ihnaravańniem prapanoŭ zaklučeńnia Techničnaha pratakoła ab supracoŭnictvie ŭ halinie achovy i vykarystańnia vodnych resursaŭ transhraničnaha basiejna raki Nioman, i pa šerahu inšych pytańniaŭ. Litva raźličvaje ŭ najbližejšaj budučyni dasiahnuć zruchaŭ va ŭsich hetych halinach», — havorycca ŭ adkazie litoŭskaha MZS.
U svaju čarhu ŭ MZS Polščy adznačyli, što praca pa padrychtoŭcy prajekta rašeńnia Savieta JES pa biełaruskich sankcyjach tolki pačałasia. «Heta značyć luboje rašeńnie, jakoje tyčycca praciahu, prypynieńnia abo admieny abmiežavalnych mier u dačynieńni da Biełarusi, jašče nie pryniataje. Polšča źjaŭlajecca aktyŭnym udzielnikam hetych abmierkavańniaŭ i chacieła b znajści toje rašeńnie, jakoje pojdzie na karyść i JES, i Biełarusi», — zajavili u pres-słužbie polskaha MZS.
Pradstaŭnik departamienta pa kamunikacyjach MZS Estonii Sandra Kamiłava paviedamiła, što Estonija znachodzicca «ŭ pracesie finalnaha farmiravańnia svajoj pazicyi». «U toj ža čas my možam pacvierdzić, što adnosiny pamiž Estonijaj i Biełarussiu palapšajucca, i my skancentravany na praktyčnym supracoŭnictvie ŭ roznych halinach. Sa svajho boku my spadziajemsia, što adnosiny pamiž Biełarussiu i JES buduć praciahvać palapšacca i supracoŭnictva stanie bolš aktyŭnym», — skazała jana.
U pres-słužbach źniešniepalityčnych viedamstvaŭ Słavakii i Čechii adznačyli, što nie ličać mahčymym abnarodavać nacyjanalnuju pazicyju svaich krain, pakolki vynikovaje rašeńnie Savieta JES budzie prymacca kalektyŭna ŭsimi krainami-členami i na asnovie kansiensusu.
«Było b niapravilna praduhledžvać rašeńnie, robiačy nacyjanalnuju pazicyju publičnaj, — zajaviŭ pres-sakratar MZS Słavakii Pieter Stana. — Ale ja mahu vas zapeŭnić, što Słavakija nadaje naležnuju ŭvahu situacyi ŭ Biełarusi i hatova ihrać aktyŭnuju rolu ŭ farmiravańni pazicyi JES pa hetym pytańni».
U pres-słužbie MZS Čechii adznačyli: «My nie možam paviedamić vam našu pazicyju zahadzia. Tym nie mienš my možam zapeŭnić, što padčas pieramovaŭ my prymiem da ŭvahi tyja pazityŭnyja kroki, jakija zrobleny Biełarussiu, asabliva vyzvaleńnie palitviaźniaŭ u žniŭni i kanstruktyŭny padychod Biełarusi da adnaŭleńnia dyjałohu pa pravach čałavieka ź JES. Adnak adsutnaść dalejšych kankretnych zachadaŭ i zachavanyja Biełarussiu abmiežavańni pa pavazie pravoŭ čałavieka taksama pavinny być pryniaty pad uvahu».
Nahadajem, da kanca lutaha JES pavinien vyznačycca nakont abmiežavalnych mier u dačynieńni da Biełarusi. Ciapier dziejničaje rašeńnie ab prypynieńni sankcyj suprać 171 fizičnaj i 10 jurydyčnych asobaŭ Biełarusi, pryniataje Jeŭrasajuzam 31 kastryčnika 2015 hoda terminam na čatyry miesiacy.
15 lutaha ŭ Brusieli projdzie pasiadžeńnie Savieta ministraŭ zamiežnych spraŭ krain JES, u paradak dnia jakoha ŭniesiena pytańnie pa Biełarusi. Pradstaŭniki aficyjnaha Minsku nieadnarazova zajaŭlali, što Biełaruś raźličvaje na poŭnuju admienu sankcyj.