Aleś Michalevič maje namier uziać udzieł u parłamienckich vybarach
Palityk budzie bałatavacca va Uruččy.
18.02.2016 / 12:08
Aleś Michalevič viarnuŭsia ŭ Biełaruś u vieraśni 2015 h., fota Siarhieja Hudzilina
Eks-kandydat u prezidenty Biełarusi Aleś Michalevič maje namier uziać udzieł u parłamienckich vybarach, paviedamiŭ palityk BiełaPAN. Michalevič płanuje bałatavacca ŭ Pałatu pradstaŭnikoŭ ad Partyi BNF pa minskim mikrarajonie Uručča.
«Usie ludzi majuć pravy, i kožny realizuje ich jak choča. Ja asabista chaču viedać, što dumajuć ludzi z nahody ŭsiaho, što adbyvajecca ŭ krainie, bo za piać hadoŭ mnohaje tut źmianiłasia, — skazaŭ jon.
— Śledstva pa majoj spravie praciahnutaje, i kali mianie pryznajuć vinavatym i nakirujuć spravu ŭ sud, viadoma, heta pieraškodzić maim płanam. Adnak u nas usio jašče jość prezumpcyja nievinavataści. Tamu zaraz ja źbiraju kamandu i rychtujusia da kampanii».
Nahadajem, rasśledavańnie kryminalnaj spravy ŭ dačynieńni da Alesia Michaleviča znoŭ praciahnutaje. Palityk da hetaha času znachodzicca pad śledstvam pa «spravie ab masavych biesparadkach» 19 śniežnia 2010 hoda. Michalevič, jak i bolšaść inšych kandydataŭ u prezidenty na vybarach 2010 hoda, byŭ zatrymany ŭ noč na 20 śniežnia. 19 lutaha 2011 hoda jaho vypuścili sa śledčaha izalatara KDB pad padpisku ab niavyjeździe, a 28-ha jon arhanizavaŭ pres-kanfierencyju, na jakoj raskazaŭ pra katavańni ŭ SIZA.
U sakaviku taho ž hoda Michalevič tajemna vyjechaŭ ź Biełarusi, patłumačyŭšy heta pahrozaj «realnaj fizičnaj raspravy», i praź niekalki tydniaŭ atrymaŭ palityčny prytułak u Čechii. U lipieni 2012 hoda jon atrymaŭ aficyjnaje apaviaščeńnie, što vyklučany z centralnaj bazy danych Interpoła jak hramadzianin, jaki znachodzicca ŭ vyšuku.
8 vieraśnia 2015 hoda jon viarnuŭsia ŭ Biełaruś i byŭ zatrymany biełaruskimi pamiežnikami na litoŭska-biełaruskaj miažy padčas pašpartnaha kantrolu jak asoba, jakaja znachodzicca ŭ nacyjanalnym vyšuku. Michaleviča pieradali milicyi, ale praź niekalki hadzin adpuścili na volu pad padpisku ab niavyjeździe. Tady palityk padaŭ va ŭpraŭleńnie Śledčaha kamiteta pa Minsku chadajnictva ab spynieńni ŭ dačynieńni da jaho kryminalnaj spravy, jakaja ŭ dačynieńni da inšych fihurantaŭ užo zakrytaja, adnak atrymaŭ admovu.