U domie byłoha kiraŭnika śpiecsłužb PNR znajšli pačak z dakumientami ahienta Vałensy
18.02.2016 / 13:58
Česłaŭ Kiščak byŭ ministram unutranych spraŭ PNR i adnym z aŭtaraŭ pahadnieńnia Kruhłaha stała ab pierachodzie Polščy da demakratyi.
Były prezident Polščy Lech Vałensa ŭsio-taki byŭ sakretnym aśviedamlalnikam śpiecsłužbaŭ kamunistyčnaj Polščy. Heta vynikaje z dakumientaŭ, znojdzienych u domie pamierłaha minułaj vosieńniu hienierała Česłava Kiščaka, jaki ŭ časy Polskaj Narodnaj Respubliki kiravaŭ śpiecsłužbami.
Jak paviedamiŭ staršynia Instytuta nacyjanalnaj pamiaci Łukaš Kaminski, u domie hienierała Kiščaka znajšli pakunak dakumientaŭ z dałučanym listom ad Kiščaka, datavanym krasavikom 1996 hoda. U im hienierał paviedamlaje, što dakumienty datyčać sakretnaha supracoŭnika pad psieŭdanimam «Bolek», pad jakim pracavaŭ Lech Vałensa.
Pakunak byŭ padrychtavany dla adpraŭki dyrektaru Nacyjanalnaha archiva, ale hienierał Kiščak tak i nie dasłaŭ jaho.
Dakumienty naličvajuć 279 staronak i ŭtrymlivajuć, miž inšym, padpisanuju Vałensam zhodu na supracu sa specsłužbami PNR i kvitancyju na atrymańnie hrašovych sum.
Ciapier adbyvajecca katałahizacyja znojdzienych dakumientaŭ.
Jak vynikaje z dakumientaŭ, Vałensa byŭ zavierbavany z 1970 da 1976 hadoŭ. Heta značyć, za čatyry hady da taho, jak jon uznačaliŭ «Salidarnaść».
Raniej tyja samyja abvinavačvańni Vałensu ŭžo vystaŭlalisia. Adnak lustracyjny sud pryznaŭ, što heta falsifikacyi, a papiery pra supracoŭnictva byli ŭ paźniejšy čas sfabrykavanyja śpiecsłužbami, kab mieć mahčymaść dyskredytavać apazicyjaniera. Novaja znachodka, imavierna, pryviadzie da paŭtornaha rasśledavańnia.
Lech Vałensa (źleva) i Česłaŭ Kiščak (sprava) byli siarod architektaraŭ Kruhłaha stała.