WSJ: Улады ЗША рэкамендуюць буйным банкам адмовіцца ад куплі дзяржаблігацый Расіі

25.02.2016 / 12:36

Амерыканскія ўлады перасцераглі буйныя банкі ЗША ад куплі дзяржаўных аблігацый Расіі. Пра гэта піша The Wall Street Journal, спасылаючыся на крыніцы, знаёмыя з сітуацыяй.

У 2016 годзе Масква ўпершыню з ўвядзення санкцый выпусціць міжнародныя аблігацыі на суму не менш як $3 млрд. Як сцвярджае WSJ, Расія запрасіла паўдзельнічаць у іх куплі еўрапейскія, кітайскія і амерыканскія банкі, у тым ліку Bank of America, Citigroup, Goldman Sachs, J.P. Morgan Chase & Co. і Morgan Stanley.

Мінфін і Дзярждэп ЗША выпусцілі спецыяльнае папярэджанне, атрымаўшы ад банкаў пытанні аб тым, ці могуць яны ўдзельнічаць у куплі бондаў. Так, у Вашынгтоне лічаць, што такія здзелкі будуць супярэчыць санкцыйнай палітыцы.

«Вельмі важна, каб прыватныя кампаніі ў ЗША, Еўрасаюзе і ва ўсім астатнім свеце разумелі, што Расея застанецца рынкам з высокай ступенню рызыкі, пакуль яна будзе працягваць дзеянні па дэстабілізацыі на Украіне», — заявілі WSJ у Дзярждэпартаменце.