У Нагорным Карабаху абвешчана перамір'е
Мінабароны непрызнанай Нагорна-Карабахскай рэспублікі заявіла аб дасягненні пагаднення аб спыненні агню. Баку гэтую інфармацыю пацвердзіў.
05.04.2016 / 14:36
AP
Армія абароны Нагорнага Карабаха атрымала загад спыніць агонь, піша расійскі партал РБК. Пра гэта паведаміў прэс-сакратар міністэрства абароны непрызнанай Нагорна-Карабахскай рэспублікі (НКР) Сенор Асрацян.
Інфармацыю пра тое, што войска Карабаха атрымала загад спыніць агонь, афіцыйны прадстаўнік вайсковага ведамства НКР пацвердзіў агенцтву Reuters.
Па словах Асрацяна, армянскі і азербайджанскі бакі канфлікту ў аўторак дасягнулі пагаднення аб спыненні агню. Карабахскія вайскоўцы атрымалі «загад палітычнага кіраўніцтва» спыніць агонь у 12:00 па мясцовым часе (11.00 па Мінску). Ён запэўніў, што гэты загад выконваецца.
Асрацян удакладніў, што загад быў выпушчаны пасля дасягнення пагаднення аб спыненні агню. «Пагадненне аб спыненні агню дасягнута сёння а 12:00 (11:00), бо адбываецца перамоўны працэс», — цытуе Асрацяна «Інтэрфакс».
Як паведамляе азербайджанскі сайт trend.az, з 12:00 5 красавіка па пагадненні бакоў аперацыі на лініі судакранання армянскіх і азербайджанскіх войскаў спыненыя, гаворыцца ў паведамленні міністэрства абароны Азербайджана.
Узброеныя сілы Азербайджана ажыццяўляюць работы па ўмацаванні на вызваленых тэрыторыях, адзначаецца ў прэс-рэлізе.
Як можна меркаваць, азербайджанцам удалося захапіць восем узгоркаў на лініі судакранання. Колькасць забітых з абодвух бакоў вымяраецца дзясяткамі, яшчэ больш параненых. Колькасць ахвяр сярод мірнага насельніцтва мінімальная, бо баі ішлі ў адселенай прыфрантавой зоне.