Biełaruska, jakaja prapanoŭvała pierajmienavać milicyju ŭ VČU, stała ŭpaŭnavažanaj pa pravach čałavieka Rasii
22.04.2016 / 20:35
Hienerał-major milicyi, deputat Dziarždumy Rasiei Taciana Maskalkova abranaja ŭpaŭnavažanaj pa pravach čałavieka Dziaržaŭnaj Dumy Rasiei. Jak pieradaje TASS, u vyniku tajnaha hałasavańnia za Maskalkovu prahałasavali 323 deputaty, 11 byli suprać, 1 ustrymaŭsia. Maskalkova pieramahła čatyroch pretendentaŭ na pasadu «ambudsmena» — hałoŭnaha aficyjnaha abaroncy pravoŭ čałavieka ŭ Rasiei.
Taciana Maskalkova naradziłasia ŭ 1955 hodzie ŭ Biełarusi, u Viciebsku. Skončyła ŭ Maskvie Ŭsiesajuzny jurydyčny zavočny instytut, słužyła ŭ MUS Rasiei, dasłužyłasia da zvańnia hienerał-majora milicyi. Pieršy raz u Dziarždumu Maskalkova sprabavała abracca ŭ 1999 hodzie ad «Jabłyka», ale niaŭdała. Paśpiachova abrałasia ŭ 2007 hodzie ad «Spraviadlivaj Rasiei».
Maskalkova viadomaja rezanansnymi prapanovami, skiravanymi na pryniaćcie bolš žorstkich zakonaŭ. Hetak, paśla akcyi hrupy Pussy Riot jana prapanavała ŭvieści kryminalnuju adkaznaść za performansy, a taksama štrafavać za niepadparadkavańnie narodnym družyńnikam. Taksama hienerał-majoru milicyi Maskalkovaj naležyć prapanova pierajmienavać MUS u VČK i «nadać jamu adpaviednyja paŭnamoctvy dziela naviadzieńnia paradku, zachavańnia krainy ŭ spakoi i biaśpiecy».
Paśla abrańnia ambudsmenam naradženka Viciebsku zajaviła, što budzie zajmacca abaronaj pravoŭ rasiejskamoŭnych za miažoj.
«Zakryvajucca rasiejskija škoły. Pryciskajucca elementarnyja pravy hramadzianaŭ Rasiei, jakija pražyvajuć za miažoj: palityčnyja, sacyjalna-ekanamičnyja dy inšyja pravy. Upaŭnavažany pa pravach čałavieka pavinien zaniacca hetaj prablemaj», — ličyć hienerał-major Taciana Maskalkova.