Minharvykankam prapanuje zabaranić prodaž ałkaholu ludziam u śpiecvopratcy
27.04.2016 / 14:51
Minharvykankam damahajecca ŭviadzieńnia zabarony na prodaž ałkaholnych napojaŭ ludziam u śpiecvopratcy, paviedamiła na pres-kanfierencyi 27 krasavika načalnik addzieła achovy pracy kamiteta pa pracy, zaniataści i sacyjalnaj abaronie Natalla Nieściarovič
«My sprabavali niekalki razoŭ u miežach akcyj «Nie pjanstvu na vytvorčaści» prapisać mahčymaść zabarony prodažu ałkaholu na hety pieryjad ludziam u kamuflažnaj i pracoŭnaj formie, — paviedamiła Nieściarovič, adkazvajučy na pytańnie BiełaPAN. — Ale nam admaŭlali, kažučy, što heta parušeńnie pravoŭ čałavieka». «Bo čałaviek moža być u formie i pa-za pracaj, jechać kudyści ŭ hości ci na daču. Hetaje pytańnie vielmi dalikatnaje, i nam nie ŭzhadnili hetyja miery. Nam pastajanna staršynia Minharvykankama stavić takuju zadaču, ale my jaje pakul nijak nie možam uzhadnić. choć, naprykład, dziejničaje zabarona na prodaž ałkaholu ŭ dni praviadzieńnia ŭ škołach apošnich zvankoŭ», — skazała načalnik addzieła.
Jana adznačyła, što, niahledziačy na praviadzieńnie akcyj, prachodžańnie miedycynskaha ahladu na šerahu pradpryjemstvaŭ pierad pačatkam źmieny, nazirajecca rost traŭmatyzmu rabotnikaŭ u stanie ałkaholnaha apjanieńnia. Tak, za minuły hod ciažkija traŭmy atrymali 14 pracaŭnikoŭ, amal udvaja bolš, čym za 2014 hod.