Pradstaŭnik Rady Jeŭropy: Naša meta — ubačyć Biełaruś u svaim składzie
28.04.2016 / 10:14
«Meta Rady Jeŭropy — ubačyć Biełaruś u svaim składzie», — zajaviŭ žurnalistam 28 krasavika ŭ Minsku dyrektar hienieralnaha dyrektarata pa pravach čałavieka i viaršenstvie prava Rady Jeŭropy Filip Buaja.
Siońnia jon udzielničaje ŭ rehijanalnaj kanfierencyi pa temie prafiesijnaj padrychtoŭki sudździaŭ i prakuroraŭ. Mierapryjemstva arhanizavanaje Radaj Jeŭropy i Hienieralnaj prakuraturaj Biełarusi.
Jak adznačyŭ Buaja, Biełaruś źjaŭlajecca paŭnapraŭnym udzielnikam dziesiaci kanviencyj Rady Jeŭropy i razhladaje mahčymaść dałučeńnia da inšych dakumientaŭ SIE. Pavodle jaho słoŭ, padčas vizitu ŭ pradstaŭnika Rady Jeŭropy adbudziecca šerah dvuchbakovych sustreč, «kab pahladzieć, jak ruchacca dalej u hetym kirunku».
Praca kanfierencyi skiravanaja na vyjaŭleńnie najbolš vostrych pytańniaŭ u miežach padrychtoŭki śpiecyjalistaŭ u halinie prava, a taksama na infarmavańnie ŭdzielnikaŭ ab mahčymaści vykarystańnia sudovaj praktyki Jeŭrapiejskaha suda pa pravach čałavieka ŭ navučalnych prahramach dla prakuroraŭ i sudździaŭ. Kanfierencyja taksama daść mahčymaść dla abmienu vopytam u halinie prahram prafiesijnaj padrychtoŭki. Buduć abmiarkoŭvacca rola i mahčymy ŭniosak prafadukacyi u pavyšeńnie efiektyŭnaści vykanańnia sudovych rašeńniaŭ na nacyjanalnym uzroŭni ŭ adpaviednaści z patrabavańniami Jeŭrapiejskaj kanviencyi pa pravach čałavieka i inšych pravavych dakumientaŭ Rady Jeŭropy. Asablivaja ŭvaha budzie nadadzienaja takim temam, jak rola prafiesijnaj padrychtoŭki ŭ pytańniach baraćby z hvałtoŭnym ekstremizmam i dapuščalnaść dokazaŭ u kryminalnym pracesie.
U kanfierencyi ŭdzielničajuć pradstaŭniki orhanaŭ dziaržaŭnaj ułady i ich navučalnych ustanoŭ Azierbajdžana, Armienii, Biełarusi, Hruzii, Kazachstana, Kyrhyzstana, Małdovy, Rasii i Ukrainy.
Biełaruś — adzinaja kraina Jeŭropy, jakaja nie źjaŭlajecca členam SIE. U 1997 hodzie jana pazbaviłasia statusu śpiecyjalna zaprošanaj u Parłamienckaj asamblei Rady Jeŭropy paśla refierendumu, jaki pašyryŭ paŭnamoctvy Alaksandra Łukašenki.
Viačasłaŭ Budkievič, BiełaPAN.