Baćka strałka z Arłanda: Mužčyny całavalisia i abdymalisia na vačach jaho žonki i syna

Dadadziena fota złačyncy

Baćka strałka z Arłanda sprabuje rastłumačyć napad syna na načny hiej-kłub, u vyniku jakoha byli zabityja 50 čałaviek, jašče 53 atrymali ranieńni.

12.06.2016 / 20:55

Amar Macin (Omar Mateen), jaki ŭčyniŭ stralbu ŭ hiej-kłubie ŭ Arłanda, moh pajści na heta z pryčyny taho, što niekalki miesiacaŭ tamu bačyŭ u Majami, jak całujucca mužčyny. Pra heta NBC News raspavioŭ baćka strałka Mir Sadyk (Mir Seddique).

Omar Mateen. Photo: MySpace

Pavodle jaho, Macin mocna razzłavaŭsia, bo mužčyny całavalisia i abdymalisia na vačach jaho žonki i syna.

Mir Sedzik dadaŭ, što choča paprasić prabačeńnia za ŭčynak syna. Jon dadaŭ, što toje, što adbyłosia, nie maje dačynieńnia da relihii.

Pakul palicyja nie havoryć pra toje, što Macin vyznavaŭ isłam. Adnak musulmanskija arhanizacyi ZŠA ŭžo paśpieli asudzić toje, što adbyłosia ŭ Arłanda.

Fota EPA/Univision Florida Central

29-hadovy Macin pryjšoŭ u kłub ź pistaletam i vintoŭkaj AR-15, zbrojaj jon vałodaŭ lehalna. NBC News udakładniaje, što mužčyna pracavaŭ u achoŭnaj struktury.

Strałok Amar Macin napaŭ na načny hiej-kłub u Arłanda, štat Fłaryda, u noč na 12 červienia. Złačyniec, uzbrojeny vintoŭkaj i pistaletam, začyniŭsia razam ź niekalkimi zakładnikami ŭ kłubie. Na miesca zdareńnia prybyli 70 palicejskich mašyn, sapiory i śpiecnaz. Strałok byŭ likvidavany ŭ vyniku praciahłaj pierastrełki z palicyjaj, tolki paśla hetaha śpiecnaz vyzvaliŭ zakładnikaŭ. U vyniku napadu byli zabityja 50 čałaviek, jašče 53 atrymali ranieńni.

Amierykanskija ŚMI nazvali stralbu ŭ Arłanda najbujniejšaj u historyi ZŠA pa kolkaści achviar. USA Today pryvodzić dadzienyja ab masavych zabojstvach pačynajučy z 1966 hoda, kali były marpiech rasstralaŭ ŭ Techasie 16 čałaviek, pierš čym byŭ likvidavany palicyjaj.

U krasaviku 2007 hoda 23-hadovy student učyniiŭ stralbu ŭ Politechničnym univiersitecie Virdžynii, zabiŭšy 32-ch čałaviek. Paśla hetaha jon nakłaŭ na siabie ruki.

U śniežni 2012 hoda Adam Łenza (Adam Lanza) 1992 hoda naradžeńnia pryjechaŭ u miascovuju pačatkovuju škołu Sendzi-Chuk, i na praciahu niekalkich chvilin rasstrelvaŭ dziaciej i nastaŭnikaŭ, paśla čaho pakončyŭ z saboj. Tady zahinuli 20 dziaciej i šeść darosłych.

U kastryčniku 1991 hoda 35-hadovy Džordž Chenard zajechaŭ na svaim pikapie ŭ vitrynu kafe ŭ Techasie i adkryŭ stralbu. Jon zabiŭ 23-ch čałaviek i ździejśniŭ samahubstva.