У Польшчы мінімальны заробак вырасце да 436 еўра

Гэта ў чатыры разы болей, чым у Беларусі.

14.06.2016 / 12:25

Урад Польшчы мае намер у наступным годзе ўстанавіць мінімальны заробак у краіне на ўзроўні 1920 злотых (каля 436 еўра) без выліку падаткаў.

Пра гэта ў панядзелак заявіла міністр сям'і, працы і сацыяльнай палітыкі Эльжбета Рафальска, паведамляе Радыё Польшча.

У аўторак 14 чэрвеня пытанне павышэння заробку абмяркуюць міністры на пасяджэнні ўрада.

Па словах польскага міністра, прапанова ўрада з'яўляецца кампрамісам паміж чаканнямі прафсаюзаў і працадаўцаў.

У той жа час прафсаюзы і арганізацыі працадаўцаў не прыйшлі да згоды ў гэтым пытанні. Першыя патрабуюць усталяваць мінімальны заробак на ўзроўні 1970 злотых (448 еўра) без выліку падаткаў, а другія хочуць павышэння зарплаты да 1862 злотых (426 еўра).

На дадзены момант мінімальны заробак у Польшчы складае 1850 злотых, гэта значыць каля 420 еўра.

Нагадаем, што ў Беларусі мінімальны заробак складае 2 млн 300 тыс. рублёў, што ў пераліку на сённяшні курс раўняецца 102 еўра.