Афіцэра ФСБ, які працаваў у аддзеле замежных царкоўных сувязяў Маскоўскага патрыярхата, асудзілі на 12 гадоў за шпіянаж
14.06.2016 / 13:34
Супрацоўнік аддзела замежных царкоўных сувязяў Маскоўскага патрыярхата Яўген Петрын прысуджаны да 12 год турмы за дзяржаўную здраду на карысць ЗША.
Прысуд быў вынесены Масгарсудом, справа разглядалася тройкай суддяў у закрытым рэжыме пад грыфам «сакрэтна».
Абарона Петрына паабяцала абскардзіць прысуд. Дзяржабвінавачанне прасіла для яго 19 гадоў калоніі строгага рэжыму.
Яўгена Петрына затрымалі ў чэрвені 2014 года. Раней у РПЦ заяўлялі, што абвінавачанне ў яго адрас звязана з працай у спецслужбах да таго, як ён прыйшоў у аддзел замежных царкоўных сувязяў.
У РПЦ на работу ён перайшоў з ФСБ.
Сваякі Петрына сцвярджалі, што ў РПЦ ён займаўся ўкраінскай тэматыкай.