Лукашэнка: Наш народ здольны тварыць цуды
22.06.2016 / 18:55
Праект праграмы сацыяльна-эканамічнага развіцця Беларусі на 2016—2020 гады, які павінен быць прыняты на V Усебеларускім народным сходзе, з'яўляецца рэалістычным, але «дазваляе значна дадаць» у развіцці краіны, заявіў Аляксандр Лукашэнка.
«Сённяшняя глабалізацыя, фундаментальныя зрухі ў сусветнай эканоміцы ставяць перад намі, як і перад іншымі краінамі, новыя задачы, у вырашэнні якіх маюцца розныя варыянты. Шчыра скажу, нам варта выбраць лепшы з іх, каб энергічна рухацца наперад да матэрыяльнага дастатку, духоўнага багацця, дабрабыту кожнага грамадзяніна, да росквіту роднай Беларусі. Але для гэтага ў першую чаргу патрэбныя адзінства і згода ў грамадстве, мір і парадак у краіне», — заявіў Лукашэнка.
На яго думку, галоўнае цяпер — выкарыстоўваць любы шанец і магчымасць «пераадолець усе цяжкасці на шляху прагрэсу і стварэння, не паддавацца дэпрэсіі ды застою, захоўваючы ўсё лепшае з мінулага, упэўнена рухацца да мэты». «Толькі той, хто ідзе, здужае дарогу. Упэўнены, мы зможам паспяхова стварыць і развіваць новыя галіны эканомікі, для гэтага ёсць усе перадумовы, можам надаць магутны імпульс уздыму традыцыйных галін за кошт інфарматызацыі, новых тэхналогій і аптымальных метадаў кіравання», — лічыць кіраўнік дзяржавы.
Лукашэнка ўпэўнены, што Беларусь на працягу пяці гадоў можа стаць адным з ключавых цэнтраў прыцягнення капіталу і ўвайсці ў лік перадавых краін свету.
«Усё залежыць ад нас, ад нашага выбару і настойлівасці ў дасягненні пастаўленых мэтаў. Жыццё паказвае, што мэтанакіраванасць народа здольная тварыць цуды. Мне бачыцца Беларусь праз пяць гадоў памацнеўшай і квітнеючай, незалежнай і прыязнай, прыгожай і ўтульнай для жыцця людзей. Так і будзе», — заявіў ён.
Лукашэнка заклікаў дэлегатаў сходу актыўна абмеркаваць палажэнні праекта праграмы сацыяльна-эканамічнага развіцця: «Аналізуйце іх, прапануйце, як больш эфектыўна разам нам працаваць, каб жыць лепш і лепш».
Згодна з праектам праграмы ў 2020 годзе прырост ВУП у параўнанні з 2015 годам павінен скласці 12—15%, а рэальных грашовых даходаў грамадзян — 9,5—11,6%. Таксама да канца пяцігодкі ўлады маюць намер скараціць інфляцыю да 5%, а стаўкі па крэдытах мяркуецца знізіць да 9—11%.