Ja — ź joj: Mišel Abama vystupiła ŭ padtrymku Chiłary Klintan
Pieršaja łedzi ZŠA Mišel Abama padtrymała Chiłary Klintan na budučych vybarach u ZŠA. «Ja - ź joj», - abviaściła Abama, vystupajučy na źjeździe demakrataŭ u Fiładelfii.
26.07.2016 / 07:57
NY Times
«Chiłary na praciahu ŭsiaho svajho žyćcia nikoli nie zdavałasia», - zajaviła žonka Baraka Abamy ŭ svajoj pramovie ŭ padtrymku Klintan.
«Dziakujučy joj maje dočki ciapier usprymajuć toj fakt, što žančyna moža stać prezidentam ZŠA, jak niešta samo saboj zrazumiełaje», - praciahnuła pieršaja łedzi.
«My pavinny ŭkłaści kožnuju kroplu našych sił, našaj straści i našaj lubovi da hetaj krainy ŭ toje, kab vybrać Chiłary Klintan prezidentam», - padahulniła Mišel Abama.
Pieršaja łedzi taksama raskrytykavała respublikanskaha kandydata Donalda Trampa za toje, što toj źviartajecca da «movy nianaviści». «Kali niechta prajaŭlaje žorstkaść abo pavodzić siabie hruba, my nie apuskajemsia da ich uzroŭniu», - skazała jana ab supierniku Klintan.
Niezadoŭha da vystupu Abamy partyja demakrataŭ pryniała pieradvybarčuju płatformu. «Siońnia Demakraty ŭchvalili samuju prahresiŭnuju pieradvybarčuju płatformu ŭ historyi», - napisała kandydat ad partyi Chiłary Klintan u svaim «Tvitery».
U pieradvybarnaj prahramie vykładzieny asnoŭnyja prablemy, jakimi budzie zajmacca administracyja Chiłary Klintan, kali jaje abiaruć prezidentam. Siarod takich pytańniaŭ - pravy ŁHBT-supolnaści, baraćba z hłabalnym paciapleńniem, pavyšeńnie dastupnaści vyšejšaj adukacyi, baraćba ź biednaściu i adstojvańnie pravoŭ źniavolenych.
Źjezd partyi demakrataŭ u Fiładelfii praciahniecca čatyry dni. Jak čakajecca, na im Chiłary Klintan budzie aficyjna abvieščanaja kandydatam na pasadu prezidenta.