Minharsud razhledzić kasacyjnuju skarhu pa spravie ab pryznańni Juryja Zacharanki pamierłym
26.07.2016 / 12:37
1 žniŭnia ŭ Minskim haradskim sudzie budzie razhladacca skarha 92-hadovaj Uljany Zacharanki, maci źnikłaha 17 hadoŭ tamu eks-ministra ŭnutranych spraŭ Biełarusi Juryja Zacharanki, ab pryznańni jaho pamierłym, paviedamlaje Biełaruski dakumientacyjny centr.
Uljana Zacharanka sprabuje abskardzić vyznačeńnie suda Kastryčnickaha rajona Minska, sudździa jakoha Volha Birula prypyniła hramadzianskuju spravu ab pryznańni jaje syna pamierłym da vyrašeńnia kryminalnaj spravy, raspačataj prakuraturaj 17 vieraśnia 1999 hoda.
Biełaruski dakumientacyjny centr zaklikaje hramadskija arhanizacyi i hramadzian padtrymać Uljanu Zacharanku i nakiravać zvaroty da prezidenta Biełarusi i ŭ Minski haradski sud z prośbaj adpravić spravu ab pryznańni Zacharanki pamierłym na novy razhlad.
Juryj Zacharanka ŭvachodziŭ u kamandu Alaksandra Łukašenki na vybarach pieršaha prezidenta Biełarusi i ŭ lipieni 1994 hoda, adrazu paśla abrańnia Łukašenki, byŭ pryznačany na pasadu ministra ŭnutranych spraŭ. U kastryčniku 1995 hoda Łukašenka adpraviŭ Zacharanku ŭ adstaŭku, a ŭ krasaviku taho ž hoda były ministr byŭ panižany ŭ zvańni da pałkoŭnika milicyi i zvolnieny z MUS nibyta za hrubyja finansavyja parušeńni i chiby ŭ pracy.
Nieŭzabavie paśla hetaha Juryj Zacharanka pierajšoŭ na bok apazicyi. U lutym 1998 hoda jon uznačaliŭ kamitet pa biaśpiecy ŭ składzie cieniavoha ŭrada. Viasnoj 1999-ha były prychilnik Łukašenki aktyŭna ŭdzielničaŭ u arhanizavanaj apazicyjaj kampanii pa vybarach prezidenta, uvachodziŭ u kamandu byłoha premjer-ministra Michaiła Čyhira, jeździŭ pa krainie, arhanizoŭvaŭ hrupy pa zbory podpisaŭ.
Uviečary 7 maja 1999 hoda Zacharanka źnik pa darozie dadomu, u rajonie vulicy Mahiloŭskaj. Sprava pa fakcie jaho zabojstva była raspačataja 17 vieraśnia 1999 hoda na padstavie artykuła 101 KK (naŭmysnaje zabojstva), ale nie zavieršanaja da hetaha času. Rasśledavańnie akaličnaściaŭ źniknieńnia apalnaha hienierała znachodzicca na kantroli Kamiteta AAN pa pravach čałavieka.