Analityki nie prahnazujuć vychadu Biełarusi z recesii ŭ hetym hodzie
26.07.2016 / 13:28
U 2016 hodzie ŭ biełaruskaj ekanomicy zachavajecca recesija, niahledziačy na zapavoleńnie jaje padzieńnia ŭ pieršaj pałovie hoda. Tak prakamientavali analityki «Śbierbanka» vyniki sacyjalna-ekanamičnaha raźvićcia Biełarusi ŭ pieršaj pałovie hoda.
«My nie čakajem značnaha palapšeńnia dynamiki VUP pa vynikach 2016 hoda. Skaračeńnie ekanomiki praciahniecca, a vychad na trajektoryju rostu mahčymy nie raniej za 2017 hod. Adnak i tady istotnaje paskareńnie małaimaviernaje», — prahnazujuć aŭtary ekanamičnaha ahladu Centra makraekanamičnych daśledavańniaŭ rasijskaha «Śbierbanka».
Na dumku ekśpiertaŭ, krynic rostu, jakija b dazvolili vyvieści biełaruskuju ekanomiku z recesii ŭ hetym hodzie, pakul niama.
Abjomy padzieńnia pramysłovaj vytvorčaści pa vynikach paŭhoddzia stali mienšymi, čym u pieršym kvartale, adnak pierśpiektyvy jaje naroščvańnia abmiežavanyja, adznačajuć analityki «Śbierbanka». «Viarnucca da rostu pramysłovaści pieraškadžaje chimičnaja vytvorčaść, jakaja ŭ pieršym paŭhoddzi skaraciłasia bolš za astatnija haliny (na 11,2%). Całkam łahičny vynik, uličvajučy padzieńnie popytu na suśvietnym rynku kalijnych uhnajeńniaŭ i, jak śledstva, źnižeńnie cenaŭ na ŭhnajeńni», — havorycca ŭ ahladzie.
Ź inšaha boku, adznačajuć ekśpierty, u Biełarusi na fonie źnižeńnia realnych dachodaŭ nasielnictva skaračajecca spažyvańnie, «jakoje najbližejšym časam zastaniecca asnoŭnym faktaram strymlivańnia dla adnaŭleńnia ekanomiki». «Skaračeńnie ŭnutranaha handlu (12,3% u struktury VUP) paskoryłasia da minus 4,2% u pieršym paŭhoddzi, suprać minus 3,1% u pieršym kvartale», — kanstatujuć analityki «Śbierbanka».
U ciapierašniaj situacyi, kali pramysłovaja vytvorčaść i spažyvańnie zastajucca admoŭnymi, rasijskija ekśpierty nie bačać pieradumoŭ dla chutkaha adnaŭleńnia biełaruskaj ekanomiki. Jany miarkujuć, što vychad u zonu anemičnaha ekanamičnaha rostu ŭ Biełarusi mahčymy «nie raniej za 2017 hod».
«U bolš doŭhaterminovaj pierśpiektyvie biełaruski ekanamičny rost zastaniecca zaležnym ad ekanamičnaha rostu Rasii. Našy raźliki pakazvajuć, što paskareńnie rostu ŭ Rasii na adzin pracentny punkt dadaje 0,7 pracentnaha punkta ŭ rost Biełarusi», — ličać analityki «Śbierbanka». Pavodle ich acenki, u vypadku adnaŭleńnia rostu ekanomiki Rasii štohadovy rost VUP Biełarusi ŭ 2018—2020 hadach moža składać 2—3%.
Jak paviedamlałasia raniej, pa vynikach pieršaj pałovy 2016 hoda VUP Biełarusi źniziŭsia na 2,5%. Aficyjny prahnoz, jaki praduhledžvaje rost ekanomiki na 0,3% u biahučym hodzie, pakul nie pierahladaŭsia.