Kabiakoŭ: Padatkovuju palityku na 2017 hod mianiać nie budziem
02.08.2016 / 18:25
Padatkovuju palityku Biełarusi ŭ 2017 hodzie źmianiać nie płanujecca, zajaviŭ siońnia premjer-ministr Andrej Kabiakoŭ na pasiadžeńni Prezidyuma Savieta Ministraŭ «Ab prajektach prahnozu sacyjalna-ekanamičnaha raźvićcia na 2017 hod i paramietraŭ asnoŭnych pakazčykaŭ na 2018-2019 hady, asnoŭnych napramkaŭ hrašova-kredytnaj palityki Respubliki Biełaruś i respublikanskaha biudžetu na 2017 hod».
«Padatkovuju palityku na 2017 hod mianiać nie budziem, prapanujecca jaje sfarmiravać, zychodziačy ź dziejučaj struktury, składu i kolkaści padatkaŭ. Padatkovuju bazu płanujecca pašyryć tolki za košt rostu ekanomiki, stvareńnia novych pradpryjemstvaŭ», — adznačyŭ Kabiakoŭ.
Praduhledžvajecca pierachod z nastupnaha hoda na vyličeńnie i vypłatu padatkaŭ, zboraŭ, pošlin z dołaraŭ na biełaruskija rubli, u tym liku pry vyznačeńni padatkovaj bazy dla vyličeńnia ziamielnaha padatku. Heta čarhovy realny krok pa dedałaryzacyi ekanomiki. «Mnohaje ŭ hetym napramku ŭžo zroblena: my admovilisia ad dołara ZŠA pa bolšaści raźlikaŭ. Budziem adychodzić ad vykarystańnia zamiežnaj valuty ŭ jakaści ekvivalenta miery koštu pry ŭstanaŭleńni taryfaŭ, stavak i cen, u tym liku pa arendzie i enierhietycy», — skazaŭ jon.
Andrej Kabiakoŭ adznačyŭ, što pytańni hrašova-kredytnaj palityki — heta tonkija instrumienty rehulavańnia makraekanamičnaj zbałansavanaści i stymulavańnia ekanamičnaha rostu. «Z hetymi instrumientami treba abychodzicca vielmi akuratna. Pry hetym ekanomika pavinna raźvivacca. Hałoŭnaje — znajści hety bałans. Paramietry hrašova-kredytnaj palityki zbałansavany z prajektami prahnozu i biudžetu», — padkreśliŭ premjer-ministr.
Važna zachavać dasiahnutuju ŭstojlivaść na valutnym i depazitnym rynku krainy. «Istotnaj prablemaj zastajecca zakredytavanaść pradpryjemstvaŭ. U asnoŭnym heta valutnyja kredyty. Heta prablema jak pradpryjemstvaŭ, tak i bankaŭ, jakuju treba vyrašać sumiesna», — reziumavaŭ Kabiakoŭ.